کەشناسی عیراق: شەپۆلێکی گەرمای بەتین بەڕێوەیە

لەچەند رۆژی داهاتو پلەکانی گەرما بەشێوەیەکی بەرچاو بەرزدەبنەوە و لە هەندێک پارێزگا 49 پلەی سەدی تۆماردەکرێت.
دەستەی کەشناسی عیراق رایگەیاند: سبەینێ پلەکانی گەرما لە سەرتاسەری وڵاتەکە بەشێوەیەکی بەرچاو بەرزدەبنەوە، بەشێوەیەک لە نەجەف بەرزترین پلەی گەرما کە 49 پلەیە و لە سلێمانیش نزمترین پلەی گەرما تۆماردەکرێت کە 42 پلەیە.
ئاماژەی بەوەشکردوە، رۆژی شەممە، کەشوهەوا لە سەرانسەری وڵاتدا سەقامگیردەبێت و پلەکانی گەرما بە بەرزی دەمێننەوە.
دەشڵێت: رۆژی یەکشەممە پلەکانی گەرما زیاتر بەرزدەبێتەوە و رۆژی دووشەممە لە ناوچەکانی ناوەڕاست و هەرێمی کوردستان کەمێک دادەبەزن.
هاوکات بەڕێوەبەرایەتی کەشناسی و بوومەلەرزەزانی هەرێمى کوردستان، کەشی پێشبینیکراوی 48 سەعاتی داهاتووی راگەیاند،  بەپێی پێشبینییەکەش سبەینێ ئاسمان ساماڵ و پەڵە هەور دەبێت و پلەی گەرما بە نزیکی 1 تـــــا 2 پلە بەرزتر دەبێت، بەرزترین پلەى گەرمیش لە کەرکوک و گەرمیان دەبێت بەجۆرێک کەپلەی گەرمی هەردوو ناوچەکە 46 پلەی سیلیزی تۆماردەکات .