ڕاوێژکارێکی سودانی: چۆڵکردنی باڵیۆزخانەی ئەمریکا پەیوەندی بە دۆخی ئەمنی عیراقەوە نییە

دوای بڕیاری چۆلکردنی باڵیۆزخانەی ئەمریکا لە عیراق، ڕاوێژکارێکی سودانی دەڵێت بڕیارەکەی ئەمریکا پەیوەندی بە دۆخی ناوچەکەوە بەگشتی هەیە و  هیچ پەیوەندییەکی ڕاستەوخۆی بە دۆخی ئەمنی ناوخۆی عیراقەوە نییە.
لەدوای كشانەوەی بەشێک لەکارمەندانی باڵیۆزخانەی ئەمریکا لە عیراق و کوەیت و بەحرەین، فەرهاد عەلادین، ڕاوێژکاری سەرۆک وەزیرانی عیراق بۆ کاروباری پەیوەندییەکانی دەرەوە ڕاگەیاند: ئەو بڕیارەی ئەمریکا لەچوارچێوەی خوێندنەوەی ئەو وڵاتە بووە بۆ دۆخی ناوچەکە بەگشتی، هیچ پەیوەندییەکی ڕاستەوخۆی بە دۆخی ئەمنی ناوخۆی عیراقەوە نییە.
 راوێژکارەکەی سودانی جەختیشی کردەوە هیچ هەڕەشەیەک لەسەر دیپلۆماتکار و کارمەندانی نێردە دیپلۆماسییەکان لە عیراق نییە.
بەرپرسێکی باڵای ئەمریکاش، کشانەوەی کارمەندان و دیپلۆماتکارە ئەمریکییەکان بۆ هەڕەشەکانی ئیسرائیل بۆ هێرشکردنەسەر ئێران دەگەڕێنێتەوە.
رۆژنامەی ئەلعەرەبییەش لەسەر ئەم پرسە بڵاوی کردووەتەوە، دوای کشانەوەی بەشێک لەهێزەکانی  لە سوریا، ئەمەریکا پێگەی خۆی لە هەولێر بەهێزتر کردووە و یەکەیەکی سەربازی و ژمارەیەکی زۆر کەرەستەی سەربازی و چەکی قورسی بۆ بنکەی هەریر گواستووەتەوە.