سه‌رۆك كۆماری عێراق:مام جەلال تۆماری خەباتی گەلێک و بەسەرهاتی ناوچەیەکی بەرفراوانە

د.بەرهەم ساڵح، سەرۆک کۆماری عێراق لە شاری بەغدا له‌ مەراسیمی چوارەمین ساڵیادی دواماڵئاوایی سەرۆک مام جەلال  رایگەیاند، مام جەلال سەرۆکێک لە پێشمەرگایەتییەوە بۆ سەرۆکایەتی کۆماری عیراق، راستگۆ لەگەڵ خۆی و میللەتی خۆی بوە بۆ گەیشتن بە ژیانێکی ئاسودە و سەرفراز بۆ گەلەکەی. هەروەها مام جەلال تۆماری خەباتی گەلێک و بەسەرهاتی ناوچەیەکی بەرفراوانە، کە زیاد لە نیو سەدە خەبات و تێکۆشانە.
 
سەرۆکایەتی کۆماری عێراق، له‌ راگه‌یه‌ندراوێكدا،  كه‌ ئێوارەی ئەمڕۆ یەکشەممە 3ی تشرینی یەکەمی 2021 بڵاوكراوه‌ته‌وه‌، ئاماژه‌ی بۆئه‌و كردوه‌، لە شاری بەغدا مەراسیمی چوارەمین ساڵیادی کۆچی دوایی سەرکردە و سەرۆکی مەزن سەرۆک مام جەلال، بە سەرپەرشتی و ئامادەبونی د. بەرھەم ساڵح، سەرۆک کۆماری عێراق و محەمەد حەلبوسی، سەرۆکی ئەنجومەنی نوێنەرانی عێراق و فایەق زێدان، سەرۆکی ئەنجومەنی باڵای دادوەری و عەمار حەکیم، سەرۆکی رەوتی حیکمەی نیشتمانی و فوئاد حسێن، وەزیری دەرەوەی عێراق و ژمارەیەک لە سەرکردە و بەرپرسانی عێراق و پەرلەمانتاران و باڵیۆز و نوێنەری وڵاتان بەرێوەچو. 

لە پەیامێکدا سەرۆک بەرھەم رایگەیاند، ئەمڕۆ هەمومان کۆبوینەتەوە لێرە بۆ یادکردنەوەی رێبەر و مامۆستا و مامی گەورەمان مام جەلال، پێم وانییە بە وتارێک و بە نوسینێک و بگرە بە کتێبێکیش بتوانین باس لەژیان و بەسەرهات و پێگەی مام جەلال بکەین، بۆ هەر یەکێ لە ئێمە مام جەلال تایبەتمەندییەکی هەیە، مام جەلال تۆماری خەباتی گەلێک و بەسەرهاتی ناوچەیەکی بەرفراوانە، زیاد لە نیو سەدە خەبات و تێکۆشانە.

 
ئاماژەی بۆئەوەشکرد، مام جەلال سەرۆکێک لە پێشمەرگایەتییەوە بۆ سەرۆکایەتی کۆماری عێراق، راستگۆ لەگەڵ خۆی و میللەتی خۆی بۆ گەیشتن بە ژیانێکی ئاسودە و سەرفراز بۆ گەلەکەی.

لە بەشێکی دیکەی پەیامەکەیدا سەرۆک کۆماری عێراق راشیگەیاند، من هیوادارم هەمومان سودمەند بین لە ئەزمونی سیاسی مام جەلال لە تێکۆشان و خەباتی چەپکە گوڵە جوانەکەی مام جەلال، پێکەوەژیان و پێکەوە هەڵکردنی پێکهاتەکان و بۆچونە جیاوازەکان سەرچاوەی هێزی هەمو لایەنەکانمانە.
لە تەوەرێکی دیکەی مەراسیمەکەدا ھەر یەک لە مستەفا کازمی، سەرۆک وەزیرانی عێراق لە رێگەی ڤیدیۆ کۆنفراس و محەممەد حەلبوسی، سەرۆک پەرلەمان و عەمار حەکیم، سەرۆکی رەوتی حیکمەی نیشتمانی و رائد فەھمی، سکرتێری لیژنەی ناوەندی حزبی شیوعی عێراق وتاریان پێشکەشکرد و جەختیانکردەوە لە رۆڵ و پێگە و حیکمەتی مام جەلال لە خەبات و تێکۆشان لە پێناو ئازادی و سەربەرزی و سەرفرزای نەک تەنھا بۆ گەلی کورد بەڵکو بۆ تەواوی گەلی عێراق و یەکخستنی بیروبۆچونە جیاوازەکان لە نێوان گشت نەتەوە و ھێز و لایەنە سیاسییەکانی عێراق بە ئاڕاستەی پاراستنی مافە رەواکانی گەلی عێراق بێ جیاوازی.