گەنجێكی كورد لە رووباری راین دەخنكێت

فیدراسیۆنی سەرانسەری پەنابەرانی عێراقی لە ئەڵمانیا رایگەیاند: دوای ئەوەی پەنابەرێكی كورد بەناوی ئەیاس حەسەن هەركی لە مانگی یانزەی ساڵی رابردوو دەچێتە سەر ڕوباری (راین) و لەنزیك كەناری روبارەكە بۆ ماوەیەك دەمێنیتەوە، ئیدی  بەدوای ئەمە،  بۆ ماوەی نزیكەی دوو مانگ هەواڵی نامێنێت.
 پاش بڵاوبونەوەی  هەواڵێك لەماڵپەری پۆلیسی شاری كۆلن دوای مانگێك سەبارەت بەدۆزینەوەی لاشەیەك لەروبارەكە ، ئامۆزایەكی ناوبراو پەیوەندی بە پۆلیسەوە دەكات و پێیان ڕادەگەێنێت، كە ئەو ناونیشانانەی لەسەر لاشەكەیە، پێشبینی دەكەن لاشەی (ئەیاس ) بێت".

ئاماژەی بەوەشكردوە، لەرۆژی  7-1-2021 چەند كەسێكی نزیكی گەنجەكە سەردانی بنكەی پۆلیس دەكەن و  پاش  بینینی تەرمەكە  بۆیان رون دەبێتە كە ئەوە لاشەی ناوبراوە.
هەربۆیە پۆلیسی ئەڵمانیا بۆ دڵنیابونی زیاتر، پشكنینی دی ئێن ئەی بۆ تەرمەكە دەكەن و لەئێستادا، كەسوكاری ناوبراو چاوەڕوانی ئەنجامەكەن بەشێوەیەكی فەرمی و یاسایی.