یەكێتی نیشتمانی كوردستان پشتیوانیی لە كوردانی فەیلی دووپاتدەكاتەوە

دوكتۆر مەجید موحەمەد ئەمین، لێپرسراوی پەیوەندییە عیراقییەكانی یەكێتیی نیشتمانیی كوردستان، ئەمڕۆ سێشەممە 12ی كانوونی دووەم، بە ئامادەبوونی رابیجە حەمەد، لێپرسراوی مەڵبەندی رێكخستنی بەغدا و ئەندامانی نوسینگەی پەیوەندییە عیراقییەكان سەردانی بارەگای بەرەی كوردانی فەیلییان كرد.


وەفدی پەیوەندییە عیراقییەكان لەمیانی سەردانەكەیاندا بۆ بارەگای بەرەی كوردانی فەیلی، لەلایەن ماهیر فەیلی، ئەمینداری گشتی بەرەی كوردانی فەیلی و نوێنەرایەتی كۆمەڵەی ئازادی كوردانی فەیلی و كۆمەڵەی ئاشتی كەڕو لاڵەكان و رێكخراوی زیندانیانی سیاسیی فەیلییەكان و بەرپرسانی ئاژانسی هەواڵەكانی فەیلی نیوزەوە پێشوازییان لێكرا.


لە دیدارەكەدا ئەو هەوڵانە تاوتوێكران كە بەرەی كوردانی فەیلی داویانە لەپێناو بەدەستهێنانی مافەكانیان لەڕێگەی هەردوو دەسەڵاتی یاسادانان و جێبەجێكردنەوە.


لای خۆیانەوە وەفدی یەكێتیی نیشتمانیی كوردستان باسیان لەڕۆڵ و خەباتی كوردانی فەیلی كرد و جەختیان كردەوە كە ئەركی یەكێتیی نیشتمانییە پاڵپشتی و پشتیوانی لە كوردانی فەیلی بكات، ئاماژەشیان بەوە كرد كەكوردانی فەیلی بەشێكن لەگەلی كوردو خاوەنی یەك ناسنامەن جا چ لەناو هەرێم بن یاخود لەدەرەوەی هەرێم، هەروەها جەختیانكردەوە كە لەسەر رێبازەكەی رابەری مەزن و سەرۆكی كۆچكردوو مام جەلال دەبن لە پیشتوانیكردنییان لەكوردانی فەیلی.


پەیوەست بەم پرسە، هەردوو لا ئاماژەیاندا بەگرنگی هاریكاری و هاوكاری هاوبەشی نێوانیان، هەروەها هەردوو لا لەسەر ئەوە رێككەوتن بەردەوامی بە دیدارو كۆبوونەوەكان بدەن و لەپێناو بەرژەوەندییە باڵاكانی گەلدا هەڵویست و دیدگایان یەكبخەن.


لەكۆتایی دیدارەكەدا، بەرەی كوردانی فەیلی سوپاسگوزاری خۆیان بۆ وەفدی یەكێتیی نیشتمانیی دەربڕی سەبارەت بە دەستپێشخەرییە جوانەكەیان و گیانی برایەتییەیان.