ئاگر له‌ گه‌وره‌تیرین ناوه‌ندی به‌رهه‌مهێنانی ڤاكسین له‌ جیهاندا كه‌وته‌وه‌

ئاگر لە باڵەخانەی پەیمانگای "سیرۆم ئینیستیوت ئۆف"ی هیندستان کەوتەوە کە گەورەترین ناوەندی بەرھەمھێنانی ڤاکسینە لە جیھاندا.
بە پێی زانیاریەکانى بەرپرسانی تەندروستيی ھیندستان، کۆگای ھەڵگرتنی ڤاکسینەکان زیانيان بەرنەکەوتوە و ئاگرەکە لە بەشێکی تەواونەکراوی بیناکەدا کەوتوەتەوە کە لە ئێستادا لە هەوڵی بيناكردنیدان.
میدیاکانی هیندستان رایانگەیاند، تا ئێستا ھۆکاری کەوتنەوەی ئاگرەکە نازاندرێت و مەترسی ئەوە ھەیە ئەو روداوە زیان بە پلانی زیادکردنی بەرھەمھێنانی ڤاکسینی دژەکۆرۆنا بگەیەنێت.
بەرپرسانی هیندستان ئاماژەیان بەوەکردوە، تیمەکانی ئاگرکوژێنەوە سێ کارمەندی ئینیستیوتەکەیان رزگارکردوە و ئاگرەکە ھیچ قوربانییەکی گیانی لێنەکەوتوەتەوە.
پەیمانگای "سیرۆم ئینیستیوت ئۆف" گەورەترین ناوەندی بەرھەمھێنانی ڤاکسینە لە جیھاندا گرێبەستێکی بۆ بەرھەمھێنانی یەک ملیار ژەم لە ڤاکسینی زانکۆی ئۆکسفۆرد و ئاسترازینیکای بریتانی واژۆ کردوە.
لە 10-ی (کانونی دوەم/1)ی ئەمساڵ هیندستان گەورەترین هەڵمتی کوتانی دەست پێکرد و 3000000 (سێ ملیۆن) کەس بە ڤاکسینی کۆرۆنا  کوتران.

 توشبون بە ڤایرۆسی کۆرۆنا لە هیندستان گەیشتوه‌ته‌ 10618062  ( دە ملیۆن و شەش سەد و هەشدە هەزار و شەست و دو کەس) لەو ژمارەیەش 152927 (سەد وپەنجا و دو هەزار و نۆ سەد و بیست و حەوت ) کەس بەهۆی کۆرۆناوە گیانیان لەدەستداوە.