قوباد تاڵه‌بانی جه‌ژنی سێ شه‌وه‌ی یارانی قه‌وڵتاس له‌ كاكه‌ییان پیرۆز ده‌كات

قوباد تاڵه‌بانی جێگری سه‌رۆكی حكومه‌تی هه‌رێمی كوردستان به‌بۆنه‌ی جه‌ژنی سێ شه‌وه‌ی یارانی قه‌وڵتاس پیرۆزبایی له‌ خوشك و برایانی كاكه‌یی ده‌كات.

ده‌قی پیرۆزبایی نامه‌كه‌........

به‌‌ڕێزان خوشك وبرا كاكه‌‌ییه‌‌كانمان

سڵاوتان لێ بێت..

بۆ هاتنه‌وه‌ی جه‌ژنی سێ شه‌وه‌ی یارانی قه‌وڵتاس - ی خوشك و برایانی كاكه‌یی، چه‌پكه‌ گوڵی پیرۆزباییتان پێشكه‌ش ده‌كه‌م و هیوای جه‌‌ژنێكی پڕ خۆشیتان بۆ ده‌‌خوازم.

كاكه‌ییه‌كان یه‌كێك له‌ سیما جوانه‌كانی فره‌یی كوردستانن، هه‌میشه‌ به‌كوردپه‌روه‌ری و قوربانیدان و وابه‌سته‌یی به‌خاك و نیشتمان ناسراون. ماوه‌ی چه‌ند ساڵێكیش كه‌وتنه‌ به‌ر ڕقی ڕه‌شی داعش له‌به‌ر شوناسی كوردبوون و تایبه‌تمه‌ندی بیروباوه‌ڕ و كلتووری جیاوازیان، ئه‌ركی هه‌موولایه‌كیشمانه‌ هه‌میشه‌ پاڵپشت و یارمه‌تیده‌ریان بین.

له‌حكومه‌تی هه‌رێم پابه‌ندیی خۆمان دووپات ده‌كه‌ینه‌وه‌ به‌ ڕه‌خساندنی زه‌مینه‌یه‌كی گونجاو بۆ ئه‌وه‌ی سه‌رجه‌م پێكهاته‌ جیاجیاكانی كوردستان له‌سایه‌یدا داب ونه‌ریتی خۆیان به‌وپه‌ڕی ئازادییه‌وه‌ به‌جێ بهێنن، پێشمانوایه‌ جیاوازی و فره‌یی سه‌رچاوه‌ی هێز و ئازادییه‌‌.
دووباره‌‌ پیرۆزبێت و جه‌ژنێكی خۆش به‌سه‌ر ببه‌ن.

قوباد تاڵه‌بانی
جێگری سه‌‌رۆكی ئه‌‌نجومه‌‌نی وه‌‌زیران