د. به‌رهه‌م ساڵح جه‌ژنی سێ شه‌وه‌ی یارانی قه‌وڵتاس له‌ كاكه‌ییان پیرۆز ده‌كات

د. به‌رهه‌م ساڵح، سه‌رۆك كۆماری عێراق به‌بۆنه‌ی جه‌ژنی سێ شه‌وه‌ی یارانی قه‌وڵتاس-ی كاكه‌ییه‌كان له‌ په‌یامێكدا، پیرۆبایی ئاڕاسته‌ی خوشك و برا كاكه‌ییه‌كان كرد.
ئه‌مه‌ش ده‌قی په‌یامی پیرۆزباییه‌كه‌ی سه‌رۆك كۆماره‌:

خوشك و برا كاكه‌‌ییه‌‌كان

به‌‌بۆنه‌‌ی جه‌ژنی سێ شه‌وه‌ی یارانی قه‌وڵتاس-ی كاكه‌ییه‌كان، گه‌رمترین پیرۆزبایی خۆم ئاڕاسته‌ی سه‌رجه‌م كاكه‌ییه‌كان‌ ده‌‌كه‌‌م.

كاكه‌‌ییه‌‌كان وه‌ك به‌‌شێكی ره‌‌سه‌‌ن و گرنگی گه‌لی عێراق، له‌گه‌ڵ پێكهاته‌كانی دیكه‌ رۆڵ و كاریگه‌ری به‌رچاویان هه‌بووه‌ له‌ خه‌بات و تێكۆشان و رووبه‌ڕووبوونه‌وه‌ دژ به‌ سته‌مكاری و دیكتاتۆریه‌ت و تیرۆر.
سه‌ره‌ڕای هه‌موو ئه‌مانه‌ش كاكه‌یییه‌كان به‌ درێژایی مێژوو هه‌وێنی ئاشتی و پێكه‌وه‌ژیان بوونه‌ له‌گه‌ڵ ئاین و پێكهاته‌كانی دیكه‌ی عێراق، بۆیه‌ جێگای خۆیه‌تی لێره‌وه‌ به‌گرنگییه‌وه‌ قوربانیدانی كاكه‌ییه‌كان به‌رز راگرین.
دووباره‌ جه‌ژنی سێ شه‌وه‌ی یارانی قه‌وڵتاس-ی كاكه‌ییه‌كان پیرۆز بێت، هیوادارم هه‌میشه‌ كاكه‌ییه‌كان له‌ ئاشتی و ئازادی و خۆشگوزه‌رانیدا بن.
هه‌میشه‌ جه‌‌ژنتان پڕ بێت له‌ شادی و خۆشی

به‌رهه‌م ساڵح
سه‌رۆك كۆماری عێراق