به‌پێی ئامارێكی ئەنجوومەنی باڵای دادوەریی رێژه‌ی جیابوونەوەی هاوسەران له‌ زیادبووندایه‌

ئەنجوومەنی باڵای دادوەریی عێراق دوایین ئاماری حاڵه‌ته‌كانی جیابوونه‌وه‌و هاوسه‌رگیریی بڵاوکردووه‌ته‌وه‌و به‌پێی ئه‌و ئاماره‌ش، ته‌نها له‌ مانگی ئۆکتۆبەر/ تشرینی یەکەمی 2023، 6 هەزار و 934 حاڵەتی جیابوونەوە لە دادگاکانی عێراق و دەرەوەی دادگاکان تۆمارکراون.

هه‌ر بە گوێرەی ئه‌و ئاماره‌ی ئه‌نجومه‌نی باڵای دادوه‌ریی، لە ماوەی مانگی تشرینی یەکەمی 2023 دا، 32 هەزار و 794 گرێبەستی هاوسه‌رگیریی لە دادگاکانی عێراق و دەرەوەی دادگاکان تۆمارکراون، زۆرترین حاڵه‌ته‌كانی هاوسه‌رگیریی و جیابوونەوەش له‌ شاری به‌غدا تۆماركراوه‌، کەمترین حاڵه‌تی هاوسه‌رگیریش له‌ پارێزگای موسه‌نا و لە پارێزگاری زیقاریش کەمترین حاڵەتەکانی جیابوونەوە تۆمارکراون.

پێشتر ناوەندی ستراتیژی بۆ مافەکانی مرۆڤ لە عێراق رایگه‌یاندبو، تەنیا لە نیوەی یەکەمی ئەمساڵ 2023، زیاتر لە شەش هەزار و 728 هاوسه‌ر جیابوونەتەوە، واتە لە ماوەی هەر سه‌عاتێكدا 10 هاوسه‌ر جیابوونەتەوە و لە رۆژێکشدا 224 هاوسه‌ر. هەروەها چوار هەزار و 259 حاڵەتی جیابوونەوەش لە دەرەوەی دادگەکان تۆمارکراون.

ئەمه‌ له‌كاتێكدا ئەنجوومەنی باڵای دادوەری رایگه‌یاندبو؛ لە ساڵی 2022 زیاتر لە 70 هەزار هاوسه‌ر لە عێراق جیابوونەتەوە، واتە رۆژانە نزیکەی 200 هاوسه‌ر.