لیژنەی دارایی لەگەڵ وەزیرانی دارایی و پلاندانانی عیراق گفتوگۆی ورد لەبارەی هەموواری یاسای بوودجەی عیراق بۆ ساڵی ٢٠٢٤ کردوو، سەبارەت بە مووچەی مووچەخۆرانی هەرێمیش ئەندامێکی لیژنەکە دەڵێت:" حکومەتی عیراق هەژماری من رەتدەکاتەوە و کاریپێناکات".
بەپێی زانیارییەکان لەکۆبوونەوەکەدا بەشێکی زۆری پرسیارەکان کە ئاڕاستەی وەزیری دارایی کراون تایبەت بووە بە دابینکردنی پارە بۆ پارێزگاکان و وەزارەتەکان و پشکی هەرێم و پرسی مووچەخۆرانی هەرێم.
ناکرێت ناردنی مووچە بەشێوەی لیست بەردەوام بێت
مستەفا گەرعاوی ئەندامی لیژنەی دارایی لەئەنجومەنی نوێنەرانی عیراق بە وێبسایتی رەسمیی یەکێتیی نیشتمانیی کوردستان PUKMEDIA ی راگەیاندووه:"حکومەتی عیراق بەهیچ شێوەیەک بەپرۆژەی هەژماری من رازی نییە و رەتیدەکاتەوە، هاوکات تەئکید لە دروستکردنی تەوتین بۆ مووچەخۆرانی هەرێم لەیەکێک لەبانکە حکومییەکانی عیراق، پاڵپشت بەبڕیارەکەی دادگای فیدراڵی دەکاتەوە"
"لە کۆبوونەوەکەدا وەزیری دارایی تەئکیدیکردەوە، کە پێویستە سەرجەم مووچەخۆرانی هەرێم لەیەکێک لەبانکە حکومییەکانی عیراق تەوتینیان بۆ بکرێت، چونکە پێی وابوو ناکرێت بەمشێوەیەی ئێستا ناردنی مووچەی مووچەخۆرانی هەرێم بەشێوەی لیست بەردەوام بێت"، مستەفا گەرعاوی.
مووچەخۆران راستەوخۆ لەبانک مووچەکانیان وەربگرن
داوادەکرێت لەدوای تەوتین کردنیان لەیەکێک لە بانکە حکومییەکانی عیراق، مووچەخۆرانی هەرێم عیراق راستەوخۆ لەو بانکانەوە مووچە وەربگرن، هەروەک بڕیارەکەی دادگای فیدراڵیش پشتیوانە و روونە لەوبارەیەوە.
ئەو ئەندامەی لیژنەی دارایی لەئەنجومەنی نوێنەرانی عیراق وتیشی:"ئەو پارانەی لەماوەی رابردوودا بەشێوەی سولفە یاخود وەک پشکی هەرێم نێردراوە، پێویستە پاکتاوی ژمێریاری بکرێت و هەر بڕە پارەیەک بکەوێتە لای حکومەتی هەرێم قۆناغ بە قۆناغ لێی وەربگیرێتەوە".
راشیگەیاند: "باشترە بۆ مووچەخۆرانی هەرێم لەدوای تەوتین کردنیان لەیەکێک لە بانکە حکومییەکانی عیراق راستەوخۆ لەو بانکانەوە مووچە وەربگرن، ئەمەش لەکاتێکدایە بڕیارەکەی دادگای فیدراڵیش پشتیوانە و روونە لەوبارەیەوە".
بودجەی عیراق زیاتر لە ٥٥ ترلیۆنە
لە بودجەی ٢٠٢٤ی عیراق دا بڕێکی زۆر پارە بۆ تێچووی دەرهێنانی نەوت خەرجدەکرێت، کە لە بنەڕەتدا نابێت ئەو بڕە پارەیە لەناو پارەی تەرخانکراوی وەبەرهێنانی هەرێم هەژمار بکرێت.
نەرمین مەعروف ئەندامی لیژنەی دارایی لەئەنجومەنی نوێنەرانی عیراق بە وێبسایتی رەسمیی یەکێتیی نیشتمانیی کوردستان PUKMEDIA ی راگەیاندووه:" بودجەی ٢٠٢٤ی عیراق زیاتر لە ٥٥ ترلیۆن دینارە، کە لەو بڕە ٤ ترلیۆن و ٩٥٤ ملیار و ٢٤٠ ملیۆن دینار بۆ هەرێم تەرخانکراوە، لەکاتێکدا ٢ ترلیۆن و ٧٠٠ ملیار دیناری بە تێچووی دەرهێنانی نەوت دەڕوات، کە لە بنەڕەتدا نابێت ئەو بڕە پارەیە لەناو پارەی تەرخانکراوی وەبەرهێنانی هەرێم هەژمار بکرێت".
"ئەم شێوازە لەهەژمارکردنی ئەو خەرجییانە بووەتە هۆکاری گەورە نیشاندانی پشکی هەرێم و گازندەی پارێزگاکانی دیکەی لەدژی هەرێم لێکەوتووەتەوە".
ئەنجومەنی وەزیرانی عیراق دوای چەند جارێک دانیشتن لەبارەی هەمواری یاسای بودجەی ٢٠٢٤ دواجار لە رۆژی ٢١-٥-٢٠٢٤ پرۆژەی یاسای هەمواری یاسای بودجەی پەسندکردو ئاڕاستەی ئەنجومەنی نوێنەرانی کرد، کە هەموارەکە پشتبەستە بەبڕگەی دووەم لە ماددەی ٧٧ی یاسای بودجەی فیدراڵی بۆ ساڵەکانی ٢٠٢٣-٢٠٢٤-٢٠٢٥.
PUKMEDIA ئاماژهی بۆئهوهكردووه كه بەپێی بەدواداچونەکانی، بودجەی ئەمساڵی عیراق نزیکەی ٢١١ ترلیۆن دینارە، کە ١٣ ترلیۆن دینار لە بودجەی ساڵی رابردوو گەورەترە، هاوکات لە بودجەکەدا پشکی هەرێمی کوردستان بۆ ساڵی ٢٠٢٤ بە زیاتر لە ٢٠ ترلیۆن و ٩١٠ ملیار دینار دیاریکراوە، کە لەو بڕە زیاتر لە ١٤ ترلیۆن و ٨٤٠ ملیار دیناری بۆ خەرجی بەگەڕخستن تەرخانکراوە، هاوکات زیاتر لە ١١ ترلیۆن و ٥٠٠ ملیار دیناریش بۆ مووچەی فەرمانبەران و خانەنشینان و تۆڕی چاودێری کۆمەڵایەتی تەرخانکراوە.
Copyright © 2020 Kirkuk Tv All Rights Reserved Designed And Developed By AVESTA GROUP