عێراق چوارەم وڵاتی عەرەبییە لە بەرهەمهێنانی لۆکەدا

وەزارەتی کشتوکاڵی ئەمریکا بەشی لێکۆڵینەوە لەبەروبوومە کستوکاڵییەکانی جیهان، لیستی ئەو وڵاتانەی بڵاوکردەوە کە پێشەنگن لە بەرهەمهێنانی لۆکەداو لەنێوان ساڵی 2023 بۆ 2024 لەناو لیستی وڵاتە عەرەبییەکاندا سودان یەکەم و عێراق چوارەم وڵاتن کە زۆرترین بڕی لۆکە بەرهەمدەهێنن.
بەگوێرەی راگەیەندراوەکە، لەسەر ئاستی جیهان چین زۆرترین بڕی لۆکە بەرهەمدەهێنێت و ساڵی 2023 بۆ 2024 بڕی پێنج ملیۆن و 730 هەزار تۆنی بەرهەمهێناوە، بەمەش 24%ـی بەرهەمی هەموو لۆکەی جیهان پێکدەهێنێت.
ئاماژە بەوەشکراوە بەتێکڕای گشتیی وڵاتانی ئاسیا 67.9٪ی بەرهەمی لۆکەی جیهان دابیندەکەن کە دەچێتە پیشەسازی جلوبەرگەوە.
لەناو وڵاتانی عەرەبی سودان و میسر و سووریا پێشەنگن لە بەرهەمهێنانی زۆرترین بڕی لۆکە.

هەروەها عێراق بە بەرهەمهێنانی 100 هەزار و 950 تۆن بە پلەی چوارەمدایەو یەمەن بە بڕی 100 هەزار و 400 تۆن لۆکە لە پلەی پێنجەمدایە.
ئەمەش لە کاتێکدایە،  لەسەر ئاستی جیهان لۆکە 53هەمین بەرهەمە کە زۆرترین بازرگانیی پێوەدەکرێت و بەشیوەیەکی سەرەکی دەچێتە نێو پیشەسازی دروستکردنی جلوبەرگەوە.