مێسى و رۆناڵدۆ نوقتە سەرى دێڕ

دوو ئەستێرە دیارو درەوشاوەکەى تۆپى پێى جیهان کە رۆژانێک گەورەو سەردارى تۆپى پێ بوون ، هەموو ژمارە پێوانییەکان بەدوای ئەواندا رایاندەکرد ، رۆژانێک مەترسیدار و سامناک و ئەفسانە و قەناس و داینەمۆ بوون ، تۆپى پێ لە ژێر نۆتەى ئەواندا ئاوازى چێژ و سەرکەوتنى دەژەنى ! ئێستا گلۆڵەى تەمەنیان داوێتى لە لێژى و هەواداراینیان ئازار دەکێشن،  کاتێک دەبنینن سەرکردەو پێشەنگەکانیان بەو جۆرە ماندووبوون و چیتر گەنج و لاوەکەى 15 ساڵ لەمەوبەر نین .
کریستیانۆ رۆناڵدۆ تەمەنى 39 ساڵى تێپەڕاندوە ، هێشتا شارەى کاپتنى ووڵاتەکەى لە قۆڵیدایە و سەرکردایەتى ووڵاتەکەى دەکات لە یۆرۆى 2024 ، ئەو یاریزانەى کە گۆڵکارى مێژووى  هەڵبژاردەکانى تۆپى پێى جیهانە  بە 130 گۆڵ ، نزیکەى  900  گۆڵى کردوە ئێستا گیرى خواردوە بەدەست نەزۆکى گۆڵ کردنەوە ، ئەو لاوەى تۆپى پێ بە پێى ئاوازى ئەو هەنگاوى دەنا ! ئەو لاوەى زۆرترین بەرزبونەوەى هەبوو بۆ تۆپى پێ ئێستا تۆپەکەکان بەسەر سەریدا تێپەڕدەبن ، ئەو لاوەى لێدانە سزاکانانى بەفێرۆ نادا ، ئێستا بۆ لەدەستچوونى دەگرێت ، ئەو ئەفسانەیەى بە موشەکى مادێرا ناسرابوو کەچى ئێستا لێدانە راستەوخۆکانى یان بەسەر گۆڵدا دەڕوات یاخو گۆڵپارێز دژى دەوەستێتەوە ، دۆن چوار یارییە لە یۆرۆ رادەکات ، داوا دەکات ، دەرفەتى بۆدورست دەبێت بەڵام چانس و هەڵکشانى تەمەن پشتى تێکردوە .
مێسى ئەفسانە لە بیرنەکراوەکەى تۆپى پێ ، ئەو یاریزانەى مەحاڵى دەکرد بە راستى ، تۆپى پێ لە مێژووى مێسیدا کۆکرابوەوە ، ئەو ئەستێرەییەى 8 بالۆن دۆر لەماڵەکەیدایە ، ئەو ئەستێرەیەى نازناوێک نەماوە لەسەر گۆى زەوی دەستى لێ نەدابێت ! ئێستا ئەویش وەک هاوڕێ رکابەرەکەى دۆش داماوەو هیچ گۆلێکى لە کوبا ئەمریکا تۆمارنەکردوە ، ئەوەتا پێکان رێگرى لێ دەکات و پێى دەلێت ئەفسانە مێسى چیتر لاوە بەنازەکەى کامپ نۆ نیت !لە بیرى مەکە تۆ ئیستا 37 ساڵیت و تۆپى پێ بۆتە لانکەى لاوە 18 ساڵانەکان ! ئەها لە یۆرۆ یامالى 16 ساڵ و ئاردا گولەى 20 ساڵ و لە کوپاش ئەندریکى 17 ساڵان چۆن رۆڵ دەگێڕن .
ئاشقانى مێسى و رۆناڵدۆ کاتێک دەبینن رابەر و سەرکردەکانیان بەو جۆرە دەردەکەون لەگەڵ ئەواندا فرمێسک دەڕێژن و خۆزگە دەخوازن هەرگیز پیربوونى ئەو دوو ئەفسانەیەى تۆپى پێیان نەبینیایە ! ئێستاش وەک دوێنێ چاوەڕوانى موعجیزە لە مێسى و دۆن دەکەن بێ ئاگا لەوەى هەردووکیان گەشتوون بە خاڵى کۆتایی و رەنگە دوای یۆرۆ و کوپا ئەمریکا هەردوو ئەفسانەکە بڵێن نوقتە سەری دێڕ.