فەرماندەیی ناوەندی هێزەکانی ئەمەریکا: هێرشەکانی داعش لە عێراق و سوریا دوو هێندە زیادیانکردووە

فەرماندەیی ناوەندی هێزەکانی ئەمەریکا لە بەیاننامەیەکدا رایگەیاند، بۆ رێگریی لە هێرشەکانی داعش لە عێراق و سوریا، بە هاوبەشی لەگەڵ هێزە ئەمنییەکانی عێراق و هاوپەیمانانی دژی بە داعش و هێزەکانی سوریای دیموکرات، چەند ئۆپەراسیۆنێکیان کردووە.
ئاماژەی بۆ ئەوەشکردوە، لە مانگی 1ـی ئەمساڵەوە تا مانگی 6، داعش 153 هێرشی لە عێراق و سوریا کردووە. ئەوەشی ئاشکراکرد، کە لە عێراق توانیویانە 196 هێرشی داعش تێکبشکێنن، 44 چەکدار بکوژن و 166 چەکداریش دەستگیربکەن، لە سوریاش 137 ئۆپەراسیۆنیان کردووە و 30 چەکداریان کوشتوە و 74 داعشیشیان دەستگیر کردووە.
لەبارەی ئۆپەراسیۆنەکانیشیان لەگەڵ هێزەکانی سوریای دیموکرات، دەڵێت: 59 ئۆپەراسیۆنمان کردووە و 14 داعش کوژراون و 92 داعشیش دەستگیرکراون.
جەختیشکردەوە، لە تەواوی ئەم ئۆپەراسیۆنانەدا، هەشت سەرکردەی داعش کوژراون و 32ـی دیکە دەستگیرکراون، کە کاریان ئۆپەراسیۆن بووە لە دەرەوەی عێراق و سوریا، ئەمە جگە لەوەی ئەرکی راهێنان بە چەکداران و بەقاچاغبردنی چەکیان هەبووە.