بڕیارە ئەمرۆ جۆ بایدن، سەرۆکی ئەمریکا دوای تیپەراندنی
کۆرۆنا و گەڕانەوەی بۆ کۆشکی سپی پیشوازی لە بنیامین نەتانیاهوو سەرۆکوەزیرانی ئیسرائیل
بکات.
بەپێی میدیاکانی ئەمریکا: کۆبوونەوەکەی بایدن و نەتانیاهوو
تایبەتە بەدواین پەرەسەندنەکانی هێرشی ئیسرائیل بۆسەر غەززە و لوبنان و سوریا و
پرسی ئاگربەست لەغەززە.
هەروەها بەرپرسێکی ئەمریکی بە رۆیتەرزی راگەیاندووە:
دانوستانی نێوان ئیسرائیل و حەماس بۆ راگەیاندنی ئاگربەست لەقۆناغی کۆتاییدایە و
بایدن و نەتانیاهوو تاوتوێی ئەو گرفتانە دەکەن کە لەبەردەم راگەیاندنی ئاگربەست
ماون.
لەلایەکی ترەوە سامی ئەبوزەهرا سەرکردەی حەماس ئاشکرایکردوە:
وتەکانی نەتانیاهوو لەبەردەم کۆنگرێسی ئەمریکا دەرخەری ئەو راستیەیە کە سەرۆکوەزیرانی
ئیسرائیل نایەوێت ئاگربەست رابگەیەنیت.
پێشتر بنیامین نەتانیاهوو جارێکی تر لەبەردەم کۆنگریسی
ئەمریکا دووپاتی کردەوە تاوەکو لەناوبردنی تەواوەتی حەماس و ئازادکردنی سەرجەم دیلەکان
لە هێرشکردن بەردەوامدەبن.
Copyright © 2020 Kirkuk Tv All Rights Reserved Designed And Developed By AVESTA GROUP