جواو فلێکس ویستى بەردەوام بوونى لە بارسێلۆنا هەیە

دواى کۆتایی هاتنى ماوەى خواستنەکەى لەگەڵ یانەى بارسێلۆنا، لە ئێستادا جواو فلێکس خواستى ئەوەى هەیە بۆ وەرزى داهاتووش، لەگەڵ یانە کەتەلۆنیەکە بەردەوام بێت.

رۆژنامەى سپۆرت، لە نوێترین هەواڵیدا ئاشکرایکردوە: جواو فلێکسى پورتوگالى، دەیەوێت بۆ وەرزى داهاتووش لەگەڵ بلوگرانا بەردەوام بێت و بە بەرگى بارسا لە لا لیگا و پاڵەوانێتیەکان دەربکەوێت، ئەم داواکاریەشى کردۆتە بەردەم بەرپرسانى هەردوو یانەى بارسێلۆنا و ئاتلێتیکۆ مەدرید، بەڵام تا ئێستا، بەرپرسانى یانەکەى هەرێمى کەتەلۆنیا و رۆخى بلانکۆس، هیچ وەڵامێکیان بۆ ئەو داواکاریەی فلێکس نەبوە.

سپۆرت، لە درێژەى هەواڵەکەیدا ئاماژەى بەوەش کردوە: چەندین یانە بۆ گواستنەوەى فلێکسى هێرشبەر هاتونەتە سەر هێڵ، کە یەکێک لەو یانانە ئەستۆن ڤێلاى ئینگلیزیە و ئیدارەى یانەکەش، ئامادەى خۆیان دەربڕیوە سەرجەم داوا کەسییەکان جێبەجێ بکەن، تا بۆ وەرزی نوێی پریمەرلیگ، سەرکردایەتى یانەکەیان بکات، هاوکات فلیکى راهێنەرى نوێی بلوگراناش، گڵۆپی سەوزى بۆ یاریزانەکە هەڵکردوە، تا وەرزى نوێش لەگەڵیان بەردەوام بێت.

جواو فلێکسى پورتوگالى و تەمەن 24 ساڵان، وەرزى رابردوو بە شێوەى خواستن پەیوەندى بە ریزەکانى یانەى بارسێلۆناوە کرد، لە ماوەى ئەو وەرزەشدا، توانى 7 گۆڵ بۆ یانەکە تۆمار بکات، ساڵى 2019، بەرامبەر بە بڕى 127 ملیۆن یۆرۆ، لە یانەى بەنفیکاوە، رویکردە یانەى ئاتلێتیکۆ مەدرید.