لە 10 ساڵدا 131 رۆژنامەوان لە تورکیا دەستگیرکراون

بەپێی ڕاپۆرتێکی ڕێکخراوێکی ڕۆژنامەوانیی، لەماوەی 10 ساڵدا لەتورکیا لانیکەم 131 رۆژنامەوان دەستگیرکراون و پێنج رۆژنامەوانیش کوژراون.

رێکخراوی رۆژنامەوانانی بێسنوور راپۆرتێکی لەبارەی دۆخی میدیا لەماوەی دەیەی رابردوودا لەتورکیا بڵاوکردووەتەوەو ئاشکرایکردووە: لەماوەی 10 ساڵی رابردوودا لانیکەم 131 رۆژنامەوان دەستگیرکراون، 40 لەوانە حوکمدراون و پێنج رۆژنامەوان کوژراون، کە سیانیان سووریی بوون.

رایشیگەیاندووە: 77 رۆژنامەوان بەتاوانی سووکایەتییکردن بە سەرۆک کۆمار، سزادراون.

ئاماژەی بەوەشکردووە: لەمیانی خۆپێشاندانەکانی گەزیدا لەژمارەیەک شاری تورکیا، 150 پەیامنێرو رۆژنامەوان هێرشیان کراوەتەسەرو تەنیا سیانیان قەرەبووکراونەتەوە.

لەکۆتایی راپۆرتەکەدا ئەوەش خراوەتەڕوو: لەساڵی 2014، ئەو کاتەی ئەردۆغان وەک سەرۆک کۆمار هەڵبژێردرا، تورکیا لەریزبەندی پێنوێنی ئازادیی رادەربڕیندا، لەناو 180 وڵاتدا لەریزبەندیی 154دا بوو، لەساڵی 2023 بۆ ریزبەندیی 165 دابەزی و لە 2024 تورکیا لەریزبەندی 158ە.