ئێران: بۆ وەڵامدانەوەی ئیسرائیل داوای مۆڵەت لە کەس ناکەین

ناسر کەنعانی، وتەبێژی وەزارەتی دەرەوەی ئێران رایگەیاند: بۆ وەڵامدانەوەی ئیسرائیل داوای مۆڵەت لە کەس ناکەین.
لەمیانەی کۆنگرەیەکی رۆژنامەوانیدا، ناسر کەنعانی، وتەبێژی وەزارەتی دەرەوەی ئێران جەختیکردەوە: سورین لەسەر بەرگریکردن لە سەروەریی وڵاتەکەمان.
روونیشیکردەوە: وەڵامدانەوەی ئیسرائیل مافی رەوای ئێرانە و بۆ ئەو کارەش داوای مۆڵەت لە کەس ناکەین و داواکاریی ئەو وڵاتانەش پێچەوانەی پرەنسیپەکانی یاسا نێودەوڵەتییەکانە و پاڵپشتییەکی ئاشکرای ئیسرائیلە.
ئەمە لە کاتێکدایە ویلاتە یەکگرتووەکانی ئەمریکا و چەند وڵاتێکی ئەوروپا داوایان لە ئێران کردووە پاشەکشە بکات لە هەڕەشەکردن و هێرشکردنە سەر ئیسرائیل لە کاردانەوەی کوشتنی ئیسماعیل هەنییە.
هاوکات رۆژنامەی واشنتن پۆست لەبارەی دواکەوتنی هێرشەکەی ئێران بۆ سەر ئیسرائیل رایگەیاند: تاران دەترسێت لەوەی تەلئەڤیڤ و واشنتن هێرشبکەنە سەر بەرنامە ئەتۆمیەکەی.
رۆژنامەکە بە پشتبەستن بە سەرچاوەیەکی نزیک لە حیزبوڵای لوبنان ئەوەشی خستووەتەڕوو، لەکاتی هێرشی ئێران بۆسەر ئیسرائیل، هاوپەیمانەکانی تاران لە عێراق و سووریاش بەنیازن هێرشبکەنە سەر بنکەکانی ئەمریکا.