قوباد تاڵەبانی، جێگری سەرۆک وەزیران، پێشوازیکرد لە ماوریتزیۆ گرێگانتی، باڵیۆزی ئیتالیا لە عێراق و لە کۆبوونەوەی نێوانیادا چەند پرسێکی جێی بایەخی هەردوولا گفتوگۆیان لەبارەوە کرا.
لە کۆبوونەوەکەدا کە رۆژی یەکشەممە ( ٢٥ی ئابی ٢٠٢٤) لە هەولێر بە ئامادەبوونی میکێلێ کامێرۆتا، کونسوڵی گشتیی ئیتالیا لە هەرێم بەڕێوەچوو، هەردوولا هاوڕابوون لەسەر کاری هاوبەش بۆ پەرەپێدانی پەیوەندییەکانی نێوان ئیتالیا و هەرێمی کوردستان لە بوارە جیاوازەکاندا.
لە بەشێکی دیکەی کۆبوونەوەکەدا گفتوگۆکرا لەبارەی هەڵبژاردنەکانی خولی داهاتووی پەرلەمانی کوردستان، جەختکرایەوە لەسەر بەڕێوەچوونی هەڵبژاردنێکی پاک و بێگەرد کە ئەنجامەکەی رەنگدانەوەی تەواوی دەنگ و ئیرادەی کۆمەڵانی خەڵکی کوردستان بێت.
لە بەشێکی دیکەی کۆبوونەوەکەدا باس لە پەیوەندییەکانی نێوان هەرێم و بەغدا کرا و لەمبارەیەشەوە، جێگری سەرۆک وەزیران بۆچوونی خۆی لەبارەی چۆنییەتی چارەسەرکردنی کێشەکان بۆ باڵیۆزی ئیتالیا روون کردەوە.
لە کۆتایی کۆبوونەوەکەدا بەبۆنەی کۆتاییهاتنی ئەرکەکەی لە عێراق، قوباد تاڵەبانی ماڵئاوایی لە ماوریتزیۆ گرێگانتی کرد و هیوای سەرکەوتنی بۆ خواست لە ئەرکی داهاتوویدا.
Copyright © 2020 Kirkuk Tv All Rights Reserved Designed And Developed By AVESTA GROUP