ئیسرائیل هەڕەشە لە یەحیا سنوار دەکات

لەمیانەی سەردانێکیدا بۆ ناوچەی نتساریمی ناوەندی غەززە، وەزیری بەرگریی ئیسرائیل رایگەیاند، تەنیا هەڵەیەک بەسە بۆ ئەوەی سوپای ئیسرائیل یەحیا سنوار و محەمەدى برای لەناوببات.
یواڤ گالانت، وەزیری بەرگریی ئیسرائیل بە میدیا ئیسرائیلییەکانی راگەیاندووە، یەحیا سنوارو براکەی وەکو ئەوانی دیکە هەمیشە بێ هەڵە نامێننەوە و وەکو محمەد زەیف و مەروان عیسا هەڵەیەک دەکەن و سوپای وڵاتەکەیان دەگەنە سەریان.
ئاشکراشیکردووە، لە کەرتی غەززە پێویستە دوو ئامانج بەدەست بهێنن و بەهەموو هێزیانەوە کار بۆ ئەو دوو ئامانجە دەکەن، ئامانجەکانیش بریتین لە کۆتاییهێنان بە بزووتنەوەی حەماس و گەڕانەوەی بارمتەکان.
وتەکانی وەزیری بەرگری ئیسرائیل لە کاتێکدایە میدیاکانی ئەو وڵاتە باس لەوەدەکەن کە هەوڵەکان بۆ گەیشتن بە رێککەوتنی ئاڵوگۆڕی بارمتە شکستی هێناوە.
هاوکات، بەگوێرەی کەناڵی 12ـى ئیسرائیلی، ئەندامێکی باڵای تیمی دانوستاندنکاری ئیسرائیل، کەسوکاری ئەو بارمتانەی لە 7ـى ئۆکتۆبەرەوە لەلایەن حەماسەوە لە کەرتی غەززە دەستبەسەرکراون ئاگادارکردووەتەوە کە، بەدوور دەزانرێت لە ئایندەیەکی نزیکدا گەیشتن بە رێککەوتنی ئاگربەست ئەنجامبدرێت.