کریستیانۆ رۆناڵدۆ بۆ نەهات بۆ عێراق ؟

کریستیانۆ رۆناڵدۆ بۆ نەهات بۆ عێراق ؟
ئاکۆ بیبانى

کریستیانۆ رۆناڵدۆ بەناوبانگترین کەسایەتى جیهان ، لەسەرجەم پلاتفۆرمەکانى سۆشیال میدیا زیاتر لە یەک ملیار فۆلۆرس و شوێنکەوتووى هەیە ! ئەمەش وایکردوە ئەو یاریزانە هەوادارێکى زۆرى لەسەرتاسەرى جیهان هەبێت و هاندەران بەتامەزرۆییەوە چاوەڕوانى بینین و یاریکردنى ئەفسانە پورتوگالییەکە بکەن .
 لەوەتەى دۆن پەیوەندى بە یانەى نەسڕى سعودییەوە کردوە دەرفەت بۆ ووڵاتانى ئاسیا زیاتر بووە تاکو هاوڵاتیانیان لە نزیکەوە بینەرى کریستیانۆ بن ، پارساڵ  cr7  لەگەڵ یانەکەى گەشتى وڵاتى ئێرانى کرد ، ژمارەیەکى زۆر لە هەوادارانى دۆن رێگاى پاسى یانەى نەسڕیان گرت کە  ئەو یاریزانەى تێدابوو ، ژمارەیەکى بێشوومار لە هەوادارانى بە دوای پاسى یانەکەوە بوون و گرفتى هاتوچۆ دروستبوو !
دوو رۆژە بەغدادى پایتەخت بەهۆى یارى نێوان شورتە و نەسرى سعودییەوە شڵەژاوە ، هۆکارەکەش بۆ بوونى کریستیانۆ رۆناڵدۆ دەگەڕایەوە ، ئەمەش وایکردبوو بلیتێکى ئاسایی نرخەکەى لە 15 هەزار دینارەوە بەرزبێتەوە بۆ سەرووى 100 هەزاردینار ، دوو رۆژە گەنجانى عێراق لەسەرجەم شارەکانەوە وێڵى دەسکەوتنى بلیت بوون ، ئامادەبوون چەند سەعاتێک لە نۆرەدا بوەستن تەنها لە پێناو ئەوەى بلیتى ئەو یارییەیان دەستبکەوێ! بەشێکیان شەوو لەبەردەم یاریگاى مەدینە خەوتوون ! ئەم فشارە گەورە جیهانییە،  وای لەیەکێتى تۆپى پێى ئاسیاکرد گەر یانەى شوورتە کۆنترۆڵى هاندەرەکانى نەکات ئەوا یارییەکە بەبێ هاندەر بەرێوەبچێت .
 ئەمرۆش دوور لە چاوەڕوانییەکان یانەى نەسڕى سعودى بەیاننامەیەکى بڵاوکردەوەو ئاماژەى بۆ ئەوەکردوە بە هۆى دووچارى بوونى بە فایرۆس رۆناڵدۆ گەشتى عێراق ناکات و بەشدارى لەو یارییەدا ناکات ، بەشێک لە چاودێران پێیان وایە یانەى نەسر و خودى یاریزانەکە ترسیان لەوە هەبووە لە شوێنى مانەوەو لەنێویاریگا سەلامەت نەبێت بۆیە ئەو بڕیارەیان داوە .
لە ئێستادا هاندەرانى وەرزشى لە عێراق بەگشتى و ئەوانەى بلیتیان کڕیوە بەتەواوى توڕەن و پێیان وایە کریستیانۆ رۆناڵدۆ ناپاکى لە هەوادارەکانى کردوە ، تاکو ئێستا نازانرێت کاردانەوەى هاندەران چى دەبێت لە یارى نێوان شوورتە و نەسڕى سعودى کە ئاخۆ دەچنە یاریگا یاخود وەک کاردانەوەیەک ئامادەى یارییەکە نابن .