لە عیراق 35 هەزار کارگە لەکارکەوتوون

لە عێراق ٣٥ هەزار کارگە لە کارکەوتوون و سەرۆکی راوێژکارانی یەکێتیی پیشەسازی عێراقیش هۆکارەکەی بۆ پاڵپشتی نەکردنی کارگەکان دەگێڕێتەوە.
عەقیل رەئوف سەرۆکی راوێژکارانی یەکێتیی پیشەسازی نیشتمانی عێراق، بە رۆژنامەی دەستوری راگەیاندووە، لە سەرانسەری وڵاتدا ٣٥ هەزار کارگە لەکارکەوتوون لەبەرئەوەی لەناوخۆدا پشتیوانییان لێناکرێت.
راشیگەیاند، لە عێراقدا ٦٧ هەزار کارگە بەرەسمی تۆمارکراون، بەڵام بەشێکی زۆری ئەو کارگانە بەهۆی کراوەیی سنوورەکانی عێراق و هاوردەکردنی شتومەکە لە دەرەوە بەشێوەی نارەسمی و بە نرخی هەرزان لەکارکەوتوون.
لە کۆتایشدا سەرۆکی راوێژکارانی یەکێتیی پیشەسازی عێراق داوای لە حکومەت کرد یاسای پاراستنی بەرهەمە ناوخۆییەکان کارا بکاتەوەو رێگرییەکانی بەردەم وەبەرهێنەرانیش لاببرێت.