ئەنجامی هەڵبژاردنی پەرلەمانی كوردستان پەسند كرا

ئەمڕۆ 24/11/2024 ئەنجومەنی كۆمیسیارانی كۆمیسیۆنی باڵای سەربەخۆی هەڵبژاردنەكانی عیراق ئەنجامی كۆتایی هەڵبژاردنی پەرلەمانی كوردستانی پەسند كرد.

 دوای پەسندكردنی ئەنجامەكانی هەڵبژاردنی خولی شەشەمی پەرلەمانی كوردستان، بەپێی ماددەی 10/ سێیەم لەیاسای ژمارە 1ی ساڵی 2005 ی یاسای سەرۆكایەتی هەرێمی كوردستان، سەرۆكی هەرێم لەماوەی 10 رۆژدا دوای پەسند كردنی ئەنجامی كۆتایی مەرسومێكی هەرێمی دەردەكات و تێیدا بانگهێشتی ئەندامانی پەرلەمانی هەڵبژێردراو دەكات بۆ یەكەم كۆبوونەوەی پەرلەمانی كوردستان و دەستپێكردنی خولی شەشەم.

رۆژی 20ـی 10ی 2024 هەڵبژاردنی خولی شەشەمی پەرلەمانی كوردستان لە بازنەكانی هەولێر، سلێمانی، دهۆك و هەڵەبجە بەڕێوەچوو، تێیدا یەكێتیی نیشتمانیی كوردستان توانی 409 هەزار و 548 دەنگی بەدەستبهێنێت و 23 كورسی پەرلەمان مسۆگەر بكات.

بەپێی پەیرەوی ناوخۆی پەرلەمانی كوردستانیش بەتەمەنترین ئەندام، سەرۆكایەتی یەكەم دانیشتن دەكات.