سەرکردەیەکی د١عش لە سنوری کەرکوك کوژرا

لەئەنجامی بۆردومانی پێگەیەكی گروپە چەكدارەكانی داعش لە چیای حەمرین گەورە تیرۆریستێک و ٥ تیرۆریستی دیکە کوژران.
فەرماندەیی ئۆپەراسیۆنە هاوبەشەکان، ئەمڕۆ هەینی لە ڕاگەیەندراوێكدا بڵاویكردەوە، هێزی ئاسمانی سوپای عێراق لە ڕێگەی فڕۆكەی  F-16ەوە حەشارگەیەکی گرنگی تیرۆریستانی لە چیای حەمرین کردە ئامانج كە بە نیازبون هێرش بكەنە سەر هێزە ئەمنییەكان.
ئاماژەی بەوەشكرد، دەزگای بەرەنگاربونەوەی تیرۆر سەرپەرشتیار و پلاندانەری هێرشەكە بوو بە هاوكاری لەگەڵ فەرماندەیی ئۆپەراسیۆنە هاوبەشەکانی کەرکوک و لەدوای بۆدرومانەكەش تەرمی شەش چەكدار دۆزراونەتەوە، كە یەكێكیان جێگری والی كەركوكی ڕێكخراوی داعشە .
بەگوێرەی راگەیەندراوەكە، هێزە ئەمنییەكان بۆ ماوەی پێنج ڕۆژ گەمارۆی چیای حەمریان داوە و كێوماڵی ناوچەكەیان كردوە، دوای گەڕان و پشكنینی ئەشکەوت و حەشارگەكان لە چیای حەمرین، هێزەکە بە سەلامەتی گەڕاوەتەوە.
ئەوەشی خستەڕو، "ئەو ئۆپەراسیۆنە پێشوەختانە لەسەر بنەمای زانیارییە هەواڵگرییە وردەکان ئەنجامدراون.