دادگای فیدڕاڵی لەسەر چەند سکاڵایەکی تایبەت بە هەرێم کۆدەبێتەوە

بڕیارە ئەمڕۆ دادگای باڵای فیدراڵی بۆ شەش سکاڵا دانیشتنی ئاسایی رێکبخات، بەپێی کارنامەکە دانیشتنەکە، سێ سکاڵایان پەیوەندی بە هەرێمی کوردستانەوە هەیە.
یەکێک لەو سکاڵایانە لەسەر سەرۆکی حکومەتی هەرێمی کوردستان و وەزیری ناوخۆ تۆمار کراون و تایبەتن بە نایاسایی بوونی سزای هاتووچۆ بۆ ئەو ئۆتۆمبێلانەی چەند جارێک لەسەر یەک شەقام خێرایی رێگەپێدراو تێدەپەڕێنن و سزا دەدرێن، لەگەڵ  نادەستوریبوونیی ئەو رسوماتەی کۆمپانیاکانی پشکنینی ئۆتۆمبێل بۆ مەرجی توندوتۆڵی لە هاووڵاتییانی وەردەگرن.
سکاڵای دووەمیش تایبەتە بە نادەستوریبوونی وەزارەتی شەهیدان و ئەنفالکراوان، کە لە سکاڵاکەدا داوا دەکرێت وەزارەتەکە هەڵبوەشێتەوە و لەبری دەستەی شەهیدان پێکبهێنرێت، کە سەر بە ئەنجوومەنی وەزیرانی هەرێمی کوردستان بێت.
سکاڵای سێیەمیش تایبەتە بە نادەستوریبوونی وەزارەتی ئەوقاف، داوا دەکرێت وەزارەتەکە هەڵبوەشێنرێتەوە و دیوانی ئاینی پێکبهێنرێت و بەجۆرێک سەرجەم ئایین و ئاینزاکان لەخۆبگرێت.
هاوکات سکاڵایەکی  دیکە ئاڕاستەی دادگای فیدراڵی کراوە و داواکراوە، زمانی کوردی بۆ رۆژنامەی وەقائیعی عیراقی زیاد بکرێت، کە ئێستا پشتگوێخراوە، هەروەها داواشکراوە رۆژنامەکە لە داهاتوودا بە زمانی کوردیش بڵاوبکرێتەوە و ژمارەکانی رابردووش وەربگێڕدرێنە سەر زمانی کوردی.