هەفتەى شکست ... کابووس ڕووی لە لیفەرپول کردوە

وەرزش
10:30 - 2025-03-17

هەفتەى شکست ... کابووس ڕووی لە لیفەرپول کردوە
ئاکۆ بیبانى
یانەى لیفەرپولى ئینگلیزى لەسەرەتاى وەرزەوە زۆر بە بەهێزى و زلهێزى دەرکەوت و تەواوى رکابەرەکانى ڕادەماڵى وەرزێکى نمونەیی دەستپێکرد و لە پرێمەرلیگ هیچ یەکێک لە ڕکابەرەکانى تواناى بەرەنگاربونەوەیان نەبوو ، لە چامپیۆنزلیگیش بەیەکەمى یانەکانى ئەوروپا گەیشتە قۆناغى شانزە،  لە کاراباو کەپیش لە یارى کۆتایی بوو ، هەموو ئەم دەسکەوتانە تەنها لەماوەى یەک هەفتەدا بەر رەشەباو زریانێکى گەورە کەوت و ئێستا تەنها ڕکابەرییەکانى خولى یانەکانى ئینگلتەراى بۆماوەتەوە .
دوای 9 ساڵ ، یۆرگن کلۆب یانەکەى لە لوتکەدا جێهێشت و ئارنى سلۆت جێگاى گرتەوە ، بەبێ ئەوەى هیچ زیادەیەک بۆ پێکهاتەکەى بکرێت ، شانى دایە بەر لێپرسراوێتى و تیپێکى تۆکمەى دروستکرد ، بەدەر لە فیدریکۆ کییزاى ئیتاڵى ئیدارەى یانەکە هیچ یاریزانێکى بۆ نەگواستەوە ، هەموو ئومێد و هیواى محەمەد سەڵاحى میسڕى بوو ، ئەو ئەستێرەیەش بەتەواوى لەجێگاى ئومێدى راهێنەرەکەیدابوو !  ئێستا یەکێکە لە دەرەوشاوەترین ئەستێرەکانى پرێمەرلیگ ، بەڵام سلۆت نەیتوانى یەدەکێکى بەهێزى هەبێت ، نۆنێز لە پاشەکشەى گەورەدایە ، گاگپۆ لە دوای پێکانەکەى هێشتا نەگەڕاوتەوە ئاستى خۆى  .
لەم وەرزەدا رێدز تەواوى نازناوەکانى لەدەستدا جگە لە پرێمەرلیگ ، ئەمە لەکاتێکدا پاڵێوراوى هەموو جامەکان بوو ، سەرەتا یانەى لیفەرپول جامى یەکێتى ئینگلتەراى لەدەستدا .
پێنج رۆژ لەمەوبەر یانەى لیفەرپول کە پاڵێوراوى بردنەوەى چامپیۆنزلیگ بوو بەرامبەر بە یانەى پاریس سانجێرمان بەلێدانى سزا شکستى هێناو لەوێش دوورخرایەوە .
هەر ئەوەنەش نا شەوى رابردوو بەتەواوى نائومیدى باڵى کێشا بەسەر شارە جوانەکەى لیفەر، کاتێک لە یارى کۆتایی جامى کاراباو کەپ بەرامبەر بە یانەى نیوکاسڵ شکستى هێناو جامەکەى پێشکەش بە ڕکابەرەکەى کرد .
ئێستا تەنها پاڵەوانێتیەک مابێت سورپۆشەکان چێژ لێ وەربگرن ، خولى نایابی ئینگلیزییە ، بەهۆى خراپی تیپەکانى ڕکابەرەوە پێ ناچێت تیپەکەى ئارنى سلۆت ئەو نازناوە لەدەستبدات کە تەنها 9 هەفتەى ماوەو جیاوازیان لەگەڵ ئارسێناڵى دوەم 12 خاڵە .

بابەتی لێکچو

Copyright © 2020 Kirkuk Tv All Rights Reserved Designed And Developed By AVESTA GROUP