قەیس خەزعەلی: دوورنییە عیراق پەلکێشی گۆڕەپانی شەڕ بکرێت

ئەمینداری عەسائیبی ئەهلی حەق دەڵێت: ئیسرائیل لەسەر سنورەکانی عێراق نزیک بووەتەوە، پڕۆژەیەکی هەیە بۆ جیاکردنەوەی خاکی کورد لە عێراق و سوریا.
قەیس خەزعەلی، ئەمینداری گشتی عەسائیبی ئەهلی حەق رایگەیاند: یەکێک لە وڵاتە عەرەبییەکان، ئەرکی جێبەجێکردنی پڕۆژەیەکی ئیسرائیلە بۆ دابەشکردنی سوریا، ناکرێت عێراق بێدەنگ بێت بەرامبەر روداوەکانی سوریا، چونکە مەترسی و هەڕەشەیەکی راستەوخۆیە بۆ سەر ئاسایشی نەتەوەیی وڵاتەکە.
باسی لەوەشکرد، هێرشەکانی ئیسرائیل لە سنوری فەلەستین و لوبناندا ناوەستێتەوە، بەڵکو ئامانجەکەی گەورەترە و کۆنترۆڵکردنی ناوچەکەیە لەلایەن ئیسرائیلەوە.
بەوتەی خەزعەلی، ئامانجێکی دیکەی ئیسرائیل دووبارە داڕشتنەوەی نەخشەی رۆژهەڵاتی ناوەڕاستە لەسەر بنەمای نەتەوەیی و ئاینی".
لەبەشێکی دیکەی وتارەکەیدا وتی: ئامانج لەو رووداوانەی لەو رۆژهەڵاتی ناوەڕاست رودەدات ئەوەیە ئیسرائیل بگاتە رووباری فورات و کۆنترۆڵی ناوچەکە بکات و رێڕەوی داود دروست بکەن.
لە بەشێکی دیکەی وتارەکەیەدا، بەدوریشی نەزانی عێراق پەلکێشی گۆڕەپانی شەڕ بکرێت، لەوەش مەترسیدارتر، هەڕەشە و دەستوەردانی تورکیایە لە عێراق و سەروەری و سەقامگیریی خاکەکەی.