رۆژنامەیەکی ئێرانی هەڕەشەی کوشتن لە ترەمپ دەکات

ڕۆژنامەیەکی ئێرانیی نزیک لە ڕێبەری باڵای وڵاتەکە هەڕەشەی کوشتن لە ترەمپ دەکات و وتەبێژی حکومەتی ئێرانیش دەڵێت بڵاوکردنەوەی ئەو بابەتە زیان لە ئاسایشی وڵات دەدات و بەهۆیەوە ئەمریکا هێرش دەکاتە سەرمان.
ڕۆژنامەی كەیهان كە ڕۆژنامەیەكی نزیک لە عەلی خامنەیی، ڕێبەری باڵای ئێرانە، بابەتێکی بڵاوکردووەتەوە و دەڵێت: لەم ڕۆژانەدا لە تۆڵەی خوێنی قاسم سولەیمانی فەرماندەی فەیلەقی قوودسی سەر بە سوپای پاسداران، تەقە لە دۆناڵد ترەمپ، سەرۆکی ئەمریکا دەکرێت, چونکە کوشتنی ترەمپ کارێکە لەلای خودا پەسەندکراوە و پێویستە.
سەبارەت بە بڵاوکردنەوەى ئەو هەواڵە دەستەی چاودێریی ڕۆژنامەوانی سەر بە وەزارەتی ڕۆشنبیریی ئێران هۆشداریی داوەتە ڕۆژنامەكە و دەڵێت: بڵاوكردنەوەی ئەم جۆرە بابەتانە زیان بە ئاسایشی ئێران و شكۆ و بەرژەوەندییەكانی دەگەیەنێت, تۆڵەی تیرۆركردنی قاسم سولەیمانی تەنیا لەڕێگەی دادگای تاوانی نێودەوڵەتییەوە دەبێت، ئەویش بە بردنی ترەمپ بۆ بەردەم دادگایەكی نێودەوڵەتی.
هەروەها فاتیمە موهاجەرانی وتەبێژی حکومەتی ئێران ڕایگەیاند: بڵاوکراوەیەکی لەم شێوەیە زیانە بۆسەر ئاسایشی وڵات و بەهانەیەک دەدات بە دەست ئەمریکاوە بۆ هێرشکردنەسەرمان.
لە وەڵامى ئەو هەواڵە ڕۆژنامەی فۆكس نیوزی ئەمریكی ئاماژەی بەوە كردووە، نابێت ترەمپ هیچ دانووستانێك لەگەڵ ئێران بكات، لەكاتێكدا هەڕەشەی تیرۆركردنی لێ دەكرێت.