له‌یادی 31 ساڵه‌ی ژیانئاوایی سه‌ركرده‌ رەسوڵ مامەند دا

سەركردەی نەمر رەسوڵ مامەند، لە دایكبووی ساڵی 1944ی ناوچەی مەرگەیە، دوای تەواوكردنی قۆناغەكانی خوێندن و تەواوكردنی قۆناغی ئامادەیی لە سلێمانی، لە كۆلێژی ماف-ی زانكۆی بەغدا وەرگیراوە و ماوەیەكیش لەوێ خوێندویەتی، بەڵام لەپێناو كێشەی گەلەكەیدا وازی لەخوێندن هێناوە و لە تەمەنی لاوێتییەوە تێكەڵاوی كاروانی خەباتی كوردایەتی بووە.
كاك رەسوڵی تێكۆشەر هێشتا لە سەرەتای بەهاری تەمەنیدا بووە كە ئەندامێكی چالاكی یەكێتی قوتابیانی كوردستان بووە و بەهۆی چالاكییەكانییەوە لە ساڵی 1968دا كراوە بە لێپرسراوی ناوچەی قەڵادزێی پارتی، بەردەوام بووە لەخەبات لە ریزەكانی پارتی و شۆڕشی ئەیلولدا تا ساڵی 1975.

دوای نسكۆی شۆڕش، لەگەڵ هاوڕێكانیدا بزوتنەوەی سۆسیالیستی كوردستانیان دامەزراندووە كە باڵێكی دیاری یەكێتی و شۆڕشی نوێ بوو، بەیەكێك لەكەسە دیارەكانی دەستەی دامەزرێنەری ئەو بزووتنەوەیە دەژمێردرێت.

لە قۆناغی سەختی شۆڕشی نوێدا لەچەندین داستان و نەبەردیی بەشدار و سەركردایەتی كردووە و رۆڵی قارەمانانەی بینیوە لە بەگژداچوونەوەی رژێمی ئەوسای عیراقدا، هەرلەسەردەمی خەباتی شاخ و پاشان لەدوای راپەڕین ماوەیەكی زۆر سكرتێری حزبی سۆسیالیستی كوردستان بووە. 

ساڵی 1993 پاش بانگەوازی یەكگرتنەوەی چەپ و سۆشیالیستەكان لەناو یەكێتیی نیشتمانیی كوردستاندا، كاك رەسوڵ و حزبەكەی یەكەم لایەن بوون كە  گەڕانەوە ناو ریزەكانی ی.ن.ك و لەناو حزبی دایکدا درێژەیاندا بە خەبات. 

 كاك رەسوڵی نەمر، وەک تێکۆشەر و سەرکردەیەکی دیاری یەکێتیی نیشتمانیی کوردستان، لە قۆناغی نوێی دوای راپەڕین رۆڵی گرنگی بینی لە هەنگاونان بۆ بەدیهێنانی ئامانجەکانی خەباتی یەکێتی و بزوتنەوەی ڕزگاریخوازی گەلی کورد بە رابەرایەتی رەوانشاد جەنابی سەرۆک مام جەلال. 

هەر لەو سەروبەندەدا، کاک رەسوڵ كرا بە كارگێڕی مەكتەبی سیاسی ی.ن.ك، دواتریش لە رۆژی 18/2/1993 كرا بەئەندامی دەستەی سەرۆكایەتی هەرێمی كوردستان.
بەداخەوە، رۆژی 12/4/1994، بە نەخۆشی لە لەندەن كۆچی دوایی كرد و گەیشتە کاروانی هاوڕێ شەهیدەکانی.

درود بۆ گیانی پاکی کاک رەسوڵ مامەندی سەرکردە و تەواوی شەهیدان و خەباتگێڕانی یەکێتیی نیشتمانیی کوردستان و بزوتنەوەی کوردایەتی و کوردستانی.