مه‌ڵبه‌ندی دیراسات كتێبێكی گرنگ بۆ زیندوهێشتنه‌وه‌ی ئه‌ده‌بیاتی مام جه‌لال چاپده‌كات

مه‌ڵبه‌ندی دیراساتی گشتی ى.ن.ک نوێترین و گرنگترین كتێب په‌یوه‌ست به‌ نووسین و ئه‌ده‌بیاتی سه‌رۆك مام جه‌لال بڵاوده‌كاته‌وه‌، كه‌ ده‌قی په‌سه‌ندكراوی هه‌ر سێ راپۆرتی كۆنگره‌كانی یه‌كه‌م و دووه‌م و سێیه‌می (ی.ن.ک)ە و بۆ یه‌كه‌مجار له‌دووتوێی كتێبێكی نایابدا به‌ناونیشانی (راپۆرته‌كان) بڵاوده‌كرێته‌وه‌.
ئەم بەرهەمە وێستگەیەکی دیکەیە لە ئەرکی پەرەپێدانی فیکری سیاسی یەکێتی و بڕیارە لە ئایندەیەکی نزیکدا لەلایەن مەڵبەندەوە رێورەسمی بڵاوکردنەوەی بۆ بکرێت.
له‌ پێشه‌كی ناساندنی كتێبه‌كه‌دا، نووسه‌ر و رۆژنامه‌نووس (ستران عه‌بدوڵا) ده‌ڵێت: "راپۆرتی سیاسی سەرۆک مام جەلال بۆ کۆنگرەکان به‌شێكی گرنگی ئه‌ده‌بیاتی یه‌كێتی و ئه‌ده‌بیاتی بزووتنه‌وه‌ی رزگاریخوازی گه‌لی كوردستانن، دیاره‌ له‌و ناوه‌ڕاسته‌شدا به‌شێكی به‌رز و بڵندی به‌رهه‌می نووسین و شرۆڤه‌ و روانگه‌كانی سه‌رۆك مام جه‌لال پێكدێنن‌.
كتێبی (راپۆرته‌كان) ئه‌ده‌بیاتی ره‌سه‌نی یه‌كێتی له‌ كایه‌ی حزبایه‌تی و خه‌باتی فیكری و سیاسی ده‌پارێزێ و بناغه‌یه‌كی ده‌وڵه‌مه‌ند بۆ په‌ره‌پێدان و پێشخستنی داده‌نێت له‌ڕێی دابینكردنی سه‌رچاوه‌ی یه‌كه‌م بۆ ئه‌كادیمیان و توێژه‌رانی بواری مام جه‌لالناسی.
مه‌ڵبه‌ندی دراسات هەروەها بەنیازە راپۆرتی سیاسیی كۆنگره‌كانی چواره‌م و پێنجه‌م-یش لە دووتوێی دوو بەرهەمی تردا چاپ بکات. بۆ ئەوەی تەواوی راپۆرتی کۆنگرەکان لە کتێبخانەی  یەکێتیی و مێژووی دەوڵەمەندیدا پارێزراوبن.