سەرۆك بافڵ: هەوڵەكانی یەكێتی بۆ یەكهەڵوێستی كورد بەردەوامن

بافڵ جەلال تاڵەبانی، سەرۆكی یەكێتیی نیشتمانیی كوردستان لە دەباشان پێشوازی لە عیرفان سدیق، باڵیۆزی نوێی بەریتانیا لە عیراق كرد.

لە دیدارێكدا دوایین پەرەسەندنەكانی ناوچەكە تاوتوێكرا و جەخت لە پابەندبوونی هەموولایەنەكان بۆ چارەسەركردنی ئاشتییانەی كێشەكان و پاراستنی سەقامگیریی رۆژهەڵاتی ناوەڕاست كرایەوە.

لە كۆبوونەوەكەدا هەردوولا پەرۆشانە پێویستی پەلەكردن لە هەنگاوەكانی پێكهێنانی كابینەی نوێی حكومەتی هەرێمی كوردستانیان دووپاتكردەوە، بەشێوەیەك ببێتە مایەی بوژاندنەوەی زیاتری هەرێمی كوردستان و یەكخستنەوەی ماڵی كورد و یەكگوتاری سیاسی بەرامبەر پێشهاتەكان و گۆڕانكارییەكانی ناوچەكە.

رەخساندنی زەمینەی لەبار بۆ ئەنجامدانی هەڵبژاردنی ئەنجوومەنی نوێنەرانی عیراق و چارەسەركردنی كێشەكانی نێوان هەولێر و بەغدا تەوەرێكی دیكەی دیدارەكە بوو كە بۆچوونیان لەبارەوە ئاڵوگۆڕكرا.

لەبارەی دۆخی سووریا و رۆژئاوای كوردستان، سەرۆك بافڵ سەرنجی خۆی خستەڕوو و وتی، هەوڵەكان بۆ یەكهەڵوێستی كورد بەردەوامن و یەكێتی هەموو هەوڵێك دەدات تاوەكو ئەم ئامانجە نیشتمانییە بەدیبێنێت و بە یەك ستراتیج لەگەڵ حكومەتی نوێی سووریا گفتوگۆ بكرێت بۆ پاراستنی مافی گەلی كورد و سەقامگیری و ئارامی ناوچەكە.