یاسای بە پارێزگابوونی هەڵەبجە دەچێتە بواری جێبەجێکردنەوە

بڕیارە ئەمڕۆ یاسای بە پارێزگابوونی هەڵەبجە لە ڕۆژنامەی وەقائیعی عێراقدا بڵاوبکرێتەوە، بەوەش یاساکە بە رەسمی دەچێتە بواری جێبەجێکردنەوە.
خالید شوانی، وەزیری دادی عێراق رایگەیاند: رۆژی (5-5-2025) ژمارەی نوێی ڕۆژنامەی وەقائیعی عێراق بڵاودەکرێتەوە و یاسای بە پارێزگابوونی هەڵەبجە لە ڕۆژنامەکەدا بڵاودەکرێتەوە.
هەرچەندە لەگەڵ بڵاوکردنەوەی لە ڕۆژنامەی وەقائیعدا یاسای بە پارێزگابوونی هەڵەبجە دەکەوێتە بواری جێبەجێکردنەوە، بەڵام بەشێک لە پەرلەمانتارانی شیعە دەڵێن: دانیشتنی پەرلەمان بۆ دەنگدان بە یاساکە نیسابی یاسایی تەواونەکردووە و تێپەڕاندنی یاساکە نایاساییە، بەوهۆیەش لە دادگای فیدڕاڵی سکاڵایان تۆمارکردووە.
رۆژی 14-4-2025 و دوای 12 ساڵ لە دواخستنیی بە هۆکاری جۆراوجۆر، پەرلەمانی عێراق دەنگیدا لەسەر یاسای بەپارێزگابوونی هەڵەبجە، 29ی نیسانیش د. لەتیف ڕەشید، سەرۆککۆماری عێراق ئیمزا لەسەر یاساکە کرد و ڕەوانەی وەزارەتی دادی کرد بەمەبەستی بڵاوکردنەوەی لە ڕۆژنامەی وەقائیعی عێراقدا.