وەزارەتی ناوخۆی عیراق لە بەرەنگاربوونەوەی ماددەى هۆشبەردا پلەی سێیەم بەدەست دەهێنێت

لە نێو 138 وڵاتدا، وەزارەتی ناوخۆی عیراق،  لە بەرەنگاربوونەوەی ماددەى هۆشبەردا پلەی سێیەم بەدەست دەهێنێت.
وەزارەتی ناوخۆی عێراق بڵاویکردووەتەوە، بە گوێرەی ریزبەندی چوارەمین خولی لووتکەی پۆلیسی جیهانیی، لە کۆی 138 وڵات و 205 ڕێکخراوی حکومی و ناحکومی، وەزارەتەکەیان لە بەرەنگاربوونەوەی ماددەی هۆشبەر و کۆنترۆڵکردنیدا لە پلەی سێیەمدایە.
وەزارەتی ناوخۆ ئاماژەی بەوەشکرد، بە هەوڵی ڕۆڵە قارەمانەکانمان، لە بەرەنگاربوونەوەی ماددەی هۆشبەر بەردەوامین و ئێستا وەزارەتەکە ڕکابەری هاوتاکانی لە وڵاتانی پێشکەوتوو دەکات، شەو و رۆژیش کاردەکەین تا پێشکەوتووتر بین و وڵاتەکەمان لەو مەترسییە بپارێزین.
بە گوێرەی ئامارەکان، تەنیا لە چارەگی یەیکەمی ئەمساڵدا،  لە عیراق زیاتر لە 3 هەزار کەس بەهۆی ماددەی هۆشبەرەوە دەستگیرکراون و دەستیش بەسەر 2 تۆن و 166 کیلۆگرام لە مادەە جیاوازەکاندا گیراوە.
خولی چوارەمی ریزبەندییەکە لەلایەن پۆلیسی دوبەیەوە کرابوو، تێیدا هیندستان پلەی یەکەم و  مۆنتینیگرۆ پلەی دووەمی بەدەستهێناوە، وەزارەتی ناوخۆی عیراقیش پلەی سێیەمی گرتووە.