تاکەى بوار بە دیگۆ سیمۆنى دەدرێت؟

دیگۆ سیمۆنى ئەرژەنتینى ، راهێنەرە توڕەو پڕ جوڵەو شپرزەکەى ئەتلەتیکۆ مەدرید ، ئەو راهێنەرەى 90 دەقیقە لەسەر هێڵى یاریگا دێت و دەڕوات بە بێ ئەوەى ماندوو بێت ، هەندێ جار کێشە بۆ داوەرانیش دروست دەکات و لە کاتى بردنەوەکان دڵخۆشەو ڕادەکات ، لە کاتى شکستەکانیش قسە دەکات و رەخنە دەگرێت.
14 ساڵە لە ئەتلەتیکۆ مەدرید مایسترۆ و پلان دارێژەرى یانەکەیە ، 14 ساڵە شێوازێکى یاریکردنى بۆ یاریزانان دروستکردوە و ئێستا یانەکە بەو شێوازە تایبەت و پڕ رۆحیەتە و تاقەت پڕوکێنە دەناسرێتەوە کە سیمۆنى هێڵە گشتییەکانى کێشاوە! ە 14 ساڵى رابردوو یانەى ئەتلەتیکۆ مەدرید بڕە پارەیەکى خەیاڵى لە گواستنەوەى یاریزانان خەرجکردوە ، شۆڕشە داراییەکەى ئەتلەتیکۆ هیچ جیاوازییەکى ئەوتۆى لەگەڵ خەرجییەکانى ریاڵ مەدرید و بارسێلۆنا نیە ، بەڵام یانەکە بێ دەستکەوتە ، یانەکە بێ نازناوە ، ئەتلەتیکۆى مەزن قۆناغى باش دەبڕێت بەڵام لە کۆتایدا تەنها ماندووبوونى بۆدەمێنێتەوە ، لە خولى ئیسپانی نەتیوانى رکابەرى بارساى پاڵەوان و ریاڵ مەدریدى دووەم بکات ، لەخولى یانە پاڵەوانەکانى ئەوروپا مایە پووچ بوو ، لە جامى شاى ئیسپانیاش دەست بەتاڵ بوو .
ساڵانە ئیدارەى یانەى ئەتلەتیکۆ مەدرید شانازییەکانى یانەکە پێشکەش بە سیمۆنى دەکەن و لەسەر مێزى گفتوگۆ کێیی دەوێت بۆى دەگوازنەوە ، دەستێوەردان لەکارەکەى ناکەن ، بۆ بەدى هێنانى ئامانجەکانى کێی پێویستە بۆى دەستەبەردەکەن ، لەو سەرەوە تیپەکە بەدەستى خاڵییەوە دەگەڕێتەوە ، لە 14 ساڵى رابردوو دیگۆى ئەرژەنتنى تەنها جارێک نەیتوانىیوە یانەکە بەنازناوى خولى یانە پاڵەوانەکانى ئەوروپا شادبکات ، هەرچەندە چەندجارێک گەیشتوە بە یارى فایناڵ .
ئێستا هاندەرانى یانە سوورو سپییەکە زۆر لە  راهێنەرەکەیان توڕەن و پێیان وایە شکستى هێناوە لەوەى ئەتلەتیکۆ بکات بە یانەیەکى زلهێز سەربارى ئەو پارە زۆرى بۆى خەرجکراوە ، ئەوەتا لە دواین پاڵەوانێتى کە جامى جیهانى یانەکان بوو ، ئەتلەتیکۆ لە قۆناغى گرووپەکان شکستى هێناو نەیتوانى بگات بە قۆناغى 16 سەربارى ئەوەى شەش خاڵى کۆکردەوە ، بەڵام بەجیاوازى گۆڵ لە پاڵەوانێتیەکە دوورخرایەوە .

ئاکۆ بیبانى