سودانی: هێرشی گروپە چەكدارەكان بۆ سەر كێڵگە نەوتییەكانی هەرێم تیرۆریستییە

 
محەمەد شیاع سودانی سەرۆك وەزیرانی عیراق هێرشی گروپە چەكدارەكان بۆ سەر كێڵگە نەوتییەكانی هەرێم بە تیرۆریستی ناودەبات.
سودانی لە چاوپێكەوتنێكدا لەگەڵ ئاژانسی ئەسۆشیەیتد پرێس رایگەیاندووە: ئەو هێرشانەی گروپە چەكدارەكان بۆسەر كێڵگە نەوتییەكانی هەرێمی كوردستان دەیکەن، كارێكی تیرۆریستییە و لەگەڵ لێپرسراوانی هەرێمیش لە هاوئاهەنگیدان بۆئەوەی بکەرانی ئەو هێرشانە بدۆزرێنەوە و بدرێنە دادگا.
وتیشی،  لە ماوەی 12 رۆژی شەڕی نێوان ئێران و ئیسرائیلدا،  رێگرییان لە 29 هەوڵی گروپە چەكدارەكان بۆ هێرشكردنەسەر ئیسرائیل و سەربازگەكانی ئەمریكا لە رێی موشەك و درۆنەوە، كردووە.
دوپاتیشكردووەتەوە، رێگە بە هیچ كەس و لایەنێك نادەن عیراق وەك سەربازگەیەك بۆ ئۆپراسیۆنی سەربازیی بەكاربهێنێت و وڵاتەکەیان بکەنە گۆڕەپانی جەنگی وڵاتانی تر.
هەر لەو چاوپێكەوتنەدا سودانی جەختیكردوەتەوە عیراق بەرژوەندیی خۆی دەپارێزێت و لە ململانێكاندا لایەنگری هیچ لایەنێك ناكات، چونكە سەقامگیری و ئاسایشی عیراق لە سەرو هەموو بەرژوەندییەكەوەیە.