ئیسرائیل بە باڵۆنێکی پێشکەوتوو چاودێری قووڵاییەکانی ئوردن، سوریا، لوبنان، عێراق و ئێران دەکات

ڕۆژنامەی یەدیعۆت ئەحرۆنۆت ڕایگەیاندووە، سوپای ئیسرائیل لە ناوچەی جەلیل باڵۆنێک بەکاردەهێنێت بۆ چاودێریکردنی هاتنە ژوورەوەی هەر فڕۆکەیەک لەودیو سنوورەوە.

ڕۆژنامەکە باڵۆنەکەی بە "گەورەترین" لە جیهاندا وەسفکردووە، درێژیەکەی 117 مەتر دەبێت و بە کامێرای تایبەت و کۆمپیوتەر و ڕادار ئامادەكراوە.

ڕۆژنامەکە دەڵێت، باڵۆنەکە دەکەوێتە سەر سێگۆشەی سنووری ئوردن و سوریا و چاودێری زەوییەکانیان دەکات، هەروەها دەتوانێت مووشەکی دوور مەودا و فڕۆکەی بێفڕۆکەوان دەستنیشان بکات کە لە عێراق، ئێران، سوریا، ئوردن و لوبنانەوە هەڵدەدرێن.

ڕۆژنامەکە پشتڕاستی کردووەتەوە کە باڵۆنەکە چاودێری فڕۆکەکانی فڕۆکەخانەی سوریا لە دیمەشق و قووڵایی لوبنان دەکات.

ڕۆژنامەکە باس لەوە دەکات کە سوپای ئیسرائیل پێشبینی دەکات شەڕی داهاتوو ڕووبەڕووبوونەوەیەکی فرە بەرەیی بێت، بە هێرشی هاوبەشی هەزاران فڕۆکە و مووشەکی کروز.

یەدیعۆت ئەحرۆنۆت پشتڕاستی دەکاتەوە کە جوڵاندن و هەڵدانی باڵۆنەکە سادە نەبووە، و یەکێکە لە ئاڵۆزترین ئۆپەراسیۆنە لۆجستیکییەکان کە هێزی ئاسمانی ئیسرائیل لە دەیەی ڕابردوودا ئەنجامیدابێت.

ڕۆژنامەکە ئاماژەی بەوەشکردووە، تیمە ئەمریکییەکان گەیشتوونەتە ئیسرائیل بۆ ئامادەكردنی باڵۆنەکە، کە "سەیری ڕۆژهەڵاتی دەکات و دوور دەبینێت، سەدان کیلۆمەتر لە قووڵایی خاکی دوژمندا دیاری دەكات".

ئاماژەی بەوەشکردووە، "بۆ زیادکردنی گۆشەی چاولێکردن، دەتوانێت بگاتە بەرزییەکی زۆر و بەم شێوەیە مەودایەکی درێژتر چاودێری بکات".

باڵۆنە نوێیەکە هاوشێوەی باڵۆنێکی دیکەیە کە پارێزگاری لە كورە ئەتۆمییەكانی دیمۆنا دەکات.

سەرچاوە: یەدیعۆت ئەحرۆنۆت