سودانی چه‌ند پرسێكی گرنگ له‌گه‌ڵ وه‌زیری وزه‌ی توركیا تاوتوێده‌كات

محەمەد شیاع سودانی سەرۆکی ئەنجومەنی وەزیرانی عێراق له‌ كۆبونه‌وه‌یدا لەگه‌ڵ وەزیری وزەو سامانە سروشتییەکانی تورکیا پرسی هه‌نارده‌كردنه‌وه‌ی نه‌وت له‌ رێگه‌ی به‌نده‌ری جیهان و كێشه‌ی به‌ردانه‌وه‌ی ئاو له‌لایه‌ن توركیاوه‌ی تاوتوێكرد. 

 نوسینگه‌ی راگه‌یاندنی محه‌مه‌د شیاع سودانی سه‌رۆكی ئه‌نجومه‌نی وه‌زیران ئاماژه‌ی بۆئه‌وه‌كردووه‌:" ئەمڕۆ چوارشەممە 22ی تشرینی دووه‌م 2023 پێشوازیکرد لە وەزیری وزە و سەرچاوە سروشتییەکانی تورکیا ئەلپ ئەرسلان بیرقەدارو وه‌فدی یاوەری و پەیوەندییەکانی هاریکاری نێوان عێراق و تورکیا لە بواری وزە و ڕێگه‌کانی پەرەپێدانیان تاوتوێکرا.

ئه‌وه‌شیخستووه‌ته‌ڕو كه‌:" هەوڵەکانی هەردوو وڵات بۆ دەستپێکردنەوەی کارەکانی کۆبوونەوەکانی لیژنەی ئابوری هاوبەش لە خولی 19هەمیندا و بەردەوامبوونی کارکردن لەسەر دۆسیەی هەناردەکردنی نەوتی عێراق لە ڕێگەی بەندەری جیهانی تورکیاوە گفتوگۆكرا.

راشیگه‌یاندووه‌:" سەرۆکی ئەنجومەنی وەزیران، ئامادەیی حکومەته‌كه‌ی بۆ دۆزینەوەی چارەسەری دەستپێکردنەوەی هەناردەکردنی نەوت به‌ پێی بنه‌ما ده‌ستوورییه‌كان ده‌ربڕیوه‌و ئاماژەشی بە دۆسیەی ئاو و پشکی ئاوی عێراق و ئاڕاستەی باشتر بەکارهێنانی کردووه‌، بەتایبەتی لە بواری کشتوکاڵدا، خواستی عێراقشی بۆ هەماهەنگی زیاتری تورکیا لەم دۆسیەیەدا دووپاتكردووه‌ته‌وه‌، کە بەهۆی کاریگەرییە ئابوری و مرۆییەکانییەوە گرنگییەکی زۆری لەلایەن حکومەتی عێراقه‌وه‌ پێده‌درێت.