ئەندازیارێکی باڵای سیستەمی بەرگری ئاسمانی حزبوڵا كوژرا

فڕۆكه‌یەکی بێفڕۆكه‌وانی ئیسرائیل ئۆتۆمبێلێكی له‌ شارۆچکەی شەعس لە ناوچەی بەعلبەک لە ڕۆژهەڵاتی لوبنان كردوه‌ته‌ ئامانج و به‌هۆیه‌وه‌ به‌رپرسێكی حزبوڵای لوبنان به‌ناوی  مه‌یسه‌م عه‌تار كوژراوه‌، كه‌ ئەندازیارێکی باڵای سیستەمی بەرگری ئاسمانییه‌.
هاوكات، کەناڵی 12ی ئیسرائیل بڵاویکردەوە، هێزی ئاسمانی ئیسرائیل ئۆپەراسیۆنێکی ئەنجامداوە و ئەندازیارێکی باڵای سیستەمی بەرگری ئاسمانی حزبوڵای لوبنانی کردوەتە ئامانج.
لەماوەی چەند مانگی ڕابردودا گرژییەکانی نێوان حزبوڵای لوبنان و ئیسرائیل پەرەیسەندوەو ترسەکانیش لە هەڵگیرسانی شەڕێکی بەرفراوان کە ڕەنگە ململانێیەکی ناوچەیی هەڵگیرسێنێت، زیاتربووە.
لەوەتەی شەڕی غەززە دەستیپێکردوە، حزبوڵای لوبنان بە پاڵپشتی ئێران و ئیسرائیل بەشێوەیەکی بەردەوام بۆردومانەکانیان لە سنوری باشوری لوبنان بۆسەر ئیسرائیل درێژەی هەبووە.
حزبوڵای لوبنان کە هاوپەیمانی بزوتنەوەی حەماسە، دەڵێت ئامانجی هێرشەکان پشتیوانیە لەو فەڵەستینیانە کە لەژێر بۆردومانی ئیسرائیلدان لە غەززە.