ئەمریکا ژمارەیەک چەکی قورسی رادەستی هێزی پێشمەرگەی کوردستان کرد

وەزیری پێشمەرگەی هەرێمی كوردستان رایگەیاند، لە درێژەی بەردەوامی هاوكاریی حكومەت و سوپای ئەمەریكا بۆ هێزی پێشمەرگە، ئەمریکا ژمارەیەك چەكی قورسی رادەستی وەزارەتی پێشمەرگە كرد.

شۆڕش ئیسماعیل، لە کۆنگرەیەکی رۆژنامەوانیدا رایگەیاند ئەمڕۆ رۆژێكی مێژووییە بۆ وەزارەتی پێشمەرگە و هێزی پێشمەگەی كوردستان، چونکە لەلایەن حكومەت و سوپای ئەمەریكاوە کۆمەڵێک چەکی قورس رادەستی وەزارەتی پیشمەرگە کراوە.

راشیگەیاند چەکەکان پێكهاتوون لە تۆپی قورس کە توانا سەربازییەكانی وەزارەتی پێشمەرگە و پێشمەرگەی كوردستان، دەگەیەنێتە ئاستێكی بەرزتر.

ئاماژەی بەوەشدا حكومەتی هەرێمی كوردستان و وەزارەتی پێشمەرگە و تەواوی فەرماندەكانی كوردستان، سوپاسی زۆری حكومەت و وەزارەتی بەرگریی ئەمەریكا دەکات، کە رۆڵێکی بەرچاویان هەبووە لە هاوكاریكردنی وەزارەتی پێشمەرگە.

لەدوای سەرهەڵدانی چەکدارانی داعشەوە لە عێراق و سوریا، ئەمریکا و هاوپەیمانەکانی بە بەردەوامی هاوکاری سوپای عێراق و هێزی پێشمەرگە دەکەن، لەو چوارچێوەیەش چەندین یاداشت و رێککەوتن ئیمزاکراوە.