سودانی: بێجی دەبێت بە گەورەترین شاری پیشەسازی نەوت لەسەر ئاستی عیراق

سەرۆكوەزیرانی عێراق ڕایدەگەیەنێت: بێجی دەبێتە گەورەترین شاری پیشەسازیی نەوت لەسەر ئاستی عێراق و ناوچەكە.

محەمەد شیاع سودانی سەرۆكوەزیرانی عێراق لە وتارێكدا لە مەراسیمی كردنەوەی ژمارەیەك پرۆژەی كەرتی نەوت لە قەزای بێجی پارێزگای سەلاحەدین رایگەیاند: پلانمان ئەوەیە بێجی ببێت بە گەورەترین شاری پیشەسازیی نەوت لەسەر ئاستی عێراق و ناوچەكە.

وتیشی: وڵاتێك كە رۆژانە زیاتر لە ٤ ملیۆن بەرمیل نەوت بەرهەمبهێنێت ناتوانێت لە هاوردەكردنی بەرهەمە نەوتییەكان و غاز بەردەوام بێت.

ئاماژەی بەوەشکرد: هەنگاوی گەورەمان هەڵگرتووە لە چارەسەری كێشەكان، بەتایبەتی لە بابەتی سوتانی غازدا، ئەمەش لەڕێگەی ئەو گرێبەست و ریككەوتنانەی بۆ راگرتنی سوتاندنی غازی كراون.

ئەمە لەکاتێکدایە، عێراق دەیەوێت لەبری ئەوەی لە بازاڕە جیهانییەكاندا بەرهەمی نەوتی خاو بفرۆشرێت، بڕێكی زۆری بەرهەمی نەوتی خاو لە پیشەسازییە نەوتییەكاندا بەكاربهێنن لەپێناو رەخساندنی هەلی كار و زیاتر برەودان بە پیشەسازییە نەوتییە ناوخۆییەکان.