ساڵانە لە عیراق 12 ملیار مەتر سێجا غاز بەبێ سوود دەسووتێت

ئاژانسی وزەی جیهانی بڵاویکردەوە، ساڵانە لە عێراق 12 ملیار مەتر سێجا غاز بەهەدەر و بێسوود دەسووتێت.
بەگوێرەی ئاژانسەکە، عێراق کار بۆ ئەوە دەکات سوتانی بێسوودی غازی ساڵانەی کەمبکاتەوە، بەڵام هەنگاوەکانی زۆر هێواش و لەسەرخۆن، ساڵانە 12 ملیار مەتر غاز بەبێ سوود دەسوتێت و ئەوەش زیانێکی گەورەی لە ئابووریی ئەو وڵاتە داوە.
راپۆرتی ئاژانسەکە ئاماژەی بۆ ئەوەش کردووە، گەشەی بەکارهێنانی غاز لە جیهاندا، لە ساڵی رابردوودا 2.8% بووە، کە دەکاتە 115 ملیار مەترسێجا و توانیویەتی رێژەیەکی زۆر لە پێداویستییەکانی هاوڵاتییان دابینبکات.
لە راپۆرتەکەدا ئاماژە بەوەکراوە لە ناوەڕاستی ساڵی رابردوودا، عێراق 65%ـی غازەکەی بێ هیچ سوودێک دەسووتێت، کە دەکاتە 12 ملیار مەتر سێجای ساڵانە.
ئەمە لە کاتێکدایە ڕۆژانی 28 و 29ی ئەم مانگە و بە بەشداریی 400 کەسایەتی سیاسی، خاوەن کۆمپانیا و و گەورە شارەزای بواری وزە، لە بەغدا "کۆنگرەی عێراق بۆ وزە" بەڕێوەدەچێت، پرسی نەوتی هەرێمی کوردستان و چارەسەرکردنی کێشەکانی نێوان هەولێر و بەغداش تەوەرێکی سەرەکی کۆنگرەکە دەبێت.
ئێستا عێراق لەڕووی یەدەگی نەوتییەوە پێنجەم دەوڵەمەنترین دەوڵەتی جیهانە و قەبارەی یەدەگی نەوتی بە 145 ملیار بەرمیل و یەدەگی غازی سروشتیشی بە زیاتر لە 126 ترلیۆن پێ سێجا مەزەندە دەکرێت.