خالد شوانی و هادی عامری پرسی زه‌وییه‌ كشتوكاڵییه‌كان تاوتوێده‌كه‌ن

د.خالید شوانی وەزیری دادی عیراق، بە ئامادەبوونی بەڕێوەبەرانی گشتیی فەرمانگەی یاسایی و فەرمانگەی تۆماری خانووبەرە، لەگەڵ بەڕێوەبەرانی بەڕێوەبەرایەتییەکانی خانووبەرە لە پارێزگای کەرکوک لەگەڵ هادی عامری سەرۆکی لیژنەی مادەی (140) کۆبووەوە.

لە میانی کۆبوونەوەکەدا، پرسی ئەو زەوییە کشتوکاڵییانەی کە یاسای گەڕاندنەوەی موڵک و ماڵ بۆ خاوەنەکانیان لە پارێزگای کەرکوک دەیانگرێتەوە تاوتوێکرا، هەروەها میکانیزمە یاسایی و کارگێڕییەکان تاوتوێکران بۆ دڵنیابوون لە جێبەجێکردنی بڕیارە پەیوەستەکان بە پێی یاسا و دەستەبەرکردنی دادپەروەری بۆ هەموو لایەنە پەیوەندیدارەکان.

وەزیری داد جەختی لە گرنگیی جێبەجێکردنی یاسا کارپێکراوەکان بە شێوەیەکی بێلایەن و شەفافانە کردەوە، هاوکات پاراستنی مافی هاووڵاتییان و جووتیاران، لەسەر بنەمای پرەنسیپەکانی یاسایی دادپەروەرانە کە چارەسەرکردنی ئەم پرسە بە شێوەیەک مسۆگەر بکات کە سەقامگیریی یاسایی و کارگێڕیی لە پارێزگاکەدا بەدیبهێنێت.