وەزارەتی ناوخۆی عیراق: تا کۆتایی 2025 دۆسیەی ئەمنیی سەرجەم پارێزگاکان بە پۆلیسی خۆجێیی دەدرێتەوە

عێراق
21:42 - 2025-03-13

وەزارەتی ناوخۆی عێراق ڕایدەگەیێنێت، پڕۆسەی ڕادەستکردنی دۆسیەی ئەمنی ئەو چوار پارێزگایەی ماوە لە کۆتایی ئەمساڵ یاخود سەرەتای ساڵی داهاتووەوە ڕادەستی پۆلیسی خۆجێیی دەکرێنەوە.
عەمید میقداد میری، وتەبێژی وەزارەتی ناوخۆی عێراق ڕایگەیاند دۆسییەی ئەمنی چەند پارێزگایەک لە کۆتایی ساڵی 2023 ڕادەستکران و بەشێکی دیکەشیان لە 2024دا، ڕادەست کران و بڕیارە تا کۆتایی ساڵی 2025 پرۆسەی ڕادەستکردنەوەکە لە هەموو پارێزگاکانی دیکەدا تەواو بێت.
میقداد میری وتیشی ئامانجی پلانەکە ئەوەیە پارێزگاکان بتوانن ئاسایشی خۆیان بە شێوەیەکی سەربەخۆ بەڕێوەببەن و سەقامگیری لە هەموو پارێزگاکاندا بەرزبکەنەوە. بۆیە لە ماوەی ئەمساڵدا دۆسیەی ئەمنی سەرجەم پارێزگاکان بە تەواوی ڕادەستی پۆلیسی خۆجێیی دەکرێتەوە.
دوای تێکشکاندنی داعش و کۆنترۆڵکردنەوەی شارەکان لە لایەن سوپاوە، دۆسیەی ئەمنی کەوتە دەست سوپا، بەپێی کارنامەی کابینەی محەممەد شیاع سوودانی، سەرۆکوەزیرانی عێراق، دەبوو لە ماوەیەکی دیاریکراودا، سوپا و هێزە سەربازییەکان لەنێو شارەکان بکشێنەوە و پۆلیسی خۆجێیی لەجێگەیان دابندرێت.

 

بابەتی لێکچو

Copyright © 2020 Kirkuk Tv All Rights Reserved Designed And Developed By AVESTA GROUP