هەشت ساڵ بەسەر كۆچی رەوانشاد نەوشیروان مستەفا تێدەپەڕێت

هەشت ساڵ بەسەر كۆچی دوایی نەوشیروان مستەفا ئەمین ئەندامی دەستەی دامەزرێنەری (ی.ن.ک)دا تێدەپەرێت.
نەوشیروان مستەفا جیا لەوەی سیاسەتمەدارێكی گەورەی كورد بوو، لەبواری خەباتی سیاسی و دیپلۆماسی و روناكبیری و راگەیاندندا خزمەتێكی گەورەی نەتەوەكەی كردووە و یەكێكیش بووە لە دەستەی دامەزرێنەرانی (ی.ن.ک)، كە لە دوای نسكۆی شۆڕشی كورد لەگەڵ ژمارەیەك لە سیاسەتمەدارو تێكۆشەری كورد شانیان دایە بەر هەستانەوەی بزوتنەوەی رزگاری خوازی گەلی كورد و پشتیوانی دامەزراندنی یەكێتیی نیشتمانییان كرد، لەساڵی 1975.
كاك نەوشیروان لە قۆناغە جیاوازەكانی خەباتدا رۆڵی كاریگەری هەبووە و پلانداڕێژەری راپەڕینی جەماورەی گەلەكەشمان بووە لەساڵی 1991.
نەوشیروان مستەفا یەكێك بووە لەو تێكۆشەرانەی هاوڕێی تەمەن و خەبات و تێكۆشانی سەرۆك مام جەلال بووەو تا ماڵئاوایشی نێوانی ئەو دوو تێكۆشەرە وەك خۆی مایەوە سەرباری بۆچوونی جیاوازی سیاسیشیان، ئەوەبوو كە بزووتنەوەی گۆڕانی دامەزراند و تا مردنی رێكخەری گشتی گۆڕان بوو.
کاک نەوشیروان خاوەنی چەندین كتێب و توێژینەوەی سیاسیی و ئەدەبی و رۆژنامەنووسی پێشكەش بە كتێبخانەی كوردی كردووە و جێدەستی دیار و بەرچاو بووە.