فیلیپی لویس پڕۆژەیەکی گەورەی ڕاهێنەرایەتییە!

فلیپى لویس ئەو راهێنەرە لاوەى کەتەمەنى 39 ساڵ تێپەڕناکات و یەکەم ئەزمونێتى لە کارى راهێنەرایەتى کەچى دەستکەوتى گەورەى لە ناوخۆى وڵاتەکەى بەدەستهێناوەو هەنگاو بەرەو جیهانیش دەنێت! فلیپى لویس لەگەڵ یانەى فلامینگۆى بەرازیلى دەردەوشێتەوە ، ژمارەو ئامارەکانى گەواهى ئەوە دەدەن لە ئایندەیەکى نزیکدا دەبێت بەیەکێک لە راهێنەرە بلیمەتەکانى جیهان و دەرگاى یانە گەورەکانى بۆدەکرێتەوە .
 سەیر ئەم ئامارە سەرنج راکێشانە بکەن کە راهێنەرە بەرازیلیەکە لەگەڵ فلامینگۆ پێى گەشتوە ، ئەوەتا لە یەکەم وەرزیدا لەگەڵ یانەکەى،  فلامینگۆى کردە پاڵەوانى خولى یانەکانى بەرازیل ، لەم وەرزەشدا لە کۆى 46 یارى ، 32 بردنەوەى بەدەستهێناوە ، تەنها 3 یارى دۆڕاوە و 11 یەکسانبوونى هەیە ، ئێستاش پێشەنگى یانەکانى خولى بەرازیلە .
دەستکەوتەکانی لویس تەنیا لە ئاستی ناوخۆدا سنووردار نین و پەلى هاویشتوە بۆ مۆندیالی یانەکان، کە لێهاتوییەکەى لە بەرامبەر چێڵسیدا دەرکەوت، کاتێک گەڕانەوەیەکی سەرسوڕهێنەری ئەنجامدا و دواکەوتنى بە گۆڵێک گۆڕى و  کردیە سەرکەوتنێکی گەورە بە ئەنجامی سێ گۆڵ بەرامبەر بە گۆلێک ،  بە دوو گۆڵ بەرامبەر بە گۆڵێکیش لە یانەی ئێسپێرانسی تونسی بردەوە و لە یاری سێیەمیش یەکسانبوو پاشان بە کۆکردنەوەی 7 خاڵ پێشەنگی کۆمەڵەکەى گرت و گەیشتە قۆناغى 16 .
لە ڕۆژانی یاریکردنیەوە، لویس ئارەزووی زۆری بۆ بنیاتنانی داهاتوویەک لە بواری ڕاهێنەرایەتیدا نیشانداوە، کاری کردووە بۆ پەرەپێدانی تواناکانی، بەدەستهێنانی بەرزترین بڕوانامەی ڕاهێنەرایەتی، بەردەوام چاودێری و فێربوونی هەندێک لە گەورەترین ڕاهێنەرانی جیهان بووە چەشنى خۆسێ مۆرینیۆ و دیێگۆ سیمیۆنی و خۆرخی جیسوس، ئەم ئامادەکارییە لەو دەمەوە بوونى هەبوو کاتێک لەگەڵ فلامینگۆ وەک یاریزان دەستی پێکرد.
ئەم ئامادەکارییە چڕ و پڕە بە شێوەیەکی سەرنجڕاکێش لە ئاستی فلامینگۆدا ڕەنگدانەوەی هەبووە، کە نەک تەنها سەرکەوتن و ئەنجامە ئەرێنییەکان بەدەست دەهێنێت، بەڵکو بە ڕێکخستنی بەهێز و یەکگرتوویی و کارەکتەری ناوازەیی، هەروەها ئامادەیی جەستەیی بەرز، کە تایبەتمەندییەکی تۆپی پێی ئەمریکای باشوورە، جیا دەکرێتەوە لە کێشوەرکانى دیکە .
فیلیپی لویس تەمەنی تەنها 39 ساڵە و پێدەچێت ڕاهێنەرێکی بەکردار بێت و بەردەوام هەنگاو بەرەو پێش لە جیهانی ڕاهێنەرایەتیدا بنێت ،  ئەگەر لەسەر ئەم ڕێگایە بەردەوام بێت، ئەوا بەم زووانە دەتوانێت ببێتە ڕاهێنەرێکی گەورە و لە ڕیزی دیارترین ڕاهێنەرەکانی جیهان بێت، لە داهاتووشدا سەرکردایەتی تیپە گەورەکانی ئەوروپا بکات.

ئاکۆ بیبانى