سودانی: لێکۆڵینەوە لە رووداوی ئاگرکەوتنەوە بکرێت

نوسینگەی راگەیاندنی سەرۆک وەزیرانی عیراق لە رایگەیەندراوێکدا ئاشکرایکرد: محەمەد شیاع سودانی، سەرۆکی ئەنجومەنی وەزیران ، وەزیری ناوخۆی ڕاسپارد بەشێوەیەکی مەیدانی ئامادەبێت لە شوێنی ڕووداوی ئاگرکەوتنەوەکەی شاری کوت و دەستبەجێ بەدواداچوون بۆ هۆکارەکان و بارودۆخی دەوروبەری بکات و لێکۆڵینەوەیەکی تەکنیکی ورد ئەنجام بدات بۆ ئاشکراکردنی هەر کەموکوڕییەک و هەموو ڕێوشوێنێکی توندی پێویست بگرێتەبەر بۆ ڕێگریکردن لە دووبارەبوونەوەی ئەو جۆرە ڕووداوانە.
هەر بەپێی راگەیەندراوەکە: لە چوارچێوەی بەدواداچوونی بەردەوامی سەرۆک وەزیران  بۆ کاردانەوەکانی ئەم ڕووداوە دڵ تەزێنە، فەرمانی ناردنی تیمێکی پزیشکی بە هەموو توانایەکەوە کرد، بۆ پشتگیریکردن لە هەوڵەکانی ڕزگارکردن و چارەسەرکردنی بریندارەکان.
ئاماژە بەوەشکراوە:  سەرۆکی ئەنجومەنی وەزیران پرسەو سەرەخۆشی خۆی ئاراستەی کەسوکاری قوربانییەکان کردو هاوخەمی و هاوسۆزی خۆی بۆیان دەربڕی، و داواکارە لە یەزدانی مەزن دڵنەوایی و ئارامییان پێ ببەخشێت.